МАН-ынхны шийдвэрээр УИХ-ын дарга Н.Учрал Монгол Улсын Ерөнхий сайдаар нэр дэвшиж байгаа учраас одоо МАН дотор спикерийн марафон эхэллээ. Мэдээж энэ суудлыг горилогчид МАН-аар дүүрэн. Ялангуяа УИХ-д олон сонгогдсон гишүүдийг зүүдлээд, орондоо орох завгүй яваа.

МАН-ын Бага хурал энэ удаад Ерөнхий сайдаа томилох асуудлыг хэлэлцсэнээс УИХ-ын дараагийн даргыг томилоогүй.

Гэхдээ Н.Учралыг Ерөнхий сайдаар томилоод, Засгийн газраа байгуулчихвал, УИХ-ын даргаа ч мөн томилоод явна. Энэ бүх улс төрийн үйл явц энэ долоо хоногт өрнөх чухал үйл явдлуудын нэг юм.

Улс төрийн хүрээнд Д.Амарбаясгалан талаас УИХ-ын даргаа тавих уу, одоогийн удирдлага талаас уу гэдэг дээрээ эцэслэн тохироогүй байгаа. Н.Учрал дараагийн Засгийн газраа хэрхэн байгуулахаас шийдэгдэх асуудал юм. МАН доторх хоёр талаас аль альнаас нь УИХ-ын даргад өөрсдийн хүнээ тавихыг хүсч буй. Гэхдээ Ц.Нямдоржийн хэлсэн УИХ-ын даргаа нам доторх цөөнхдөө өгсөн нь дээр, ингэж байж цаашид улс төр чинь эвтэйхэн явна гэж хэлсэн нь учиртай. Одоогийн нөхцөлд нам доторх цөөнх нь Д.Амарбаясгалан тэргүүтнүүд. Тиймээс тэд өөрсдийн хүмүүсээ УИХ-ын даргад томилох хүсэлтэй байгаа бөгөөд тэдний талаас УИХ-ын гишүүн С.Амарсайхан, Ж.Бат-Эрдэнэ нар яригдаж байв.

Гэхдээ Ц.Нямдоржийн хэлснээр бол УИХ-ын даргаа олонх тал нь авахаар тохиролцсон гэж уншигдаж байгаа юм. Тиймээс ч та нар цөөнхдөө өгөх ёстой гэдгийг Ц.Нямдорж Бага хурал дээрээ хэлсэн болов уу.

Одоогийн МАН доторх олонх талаас УИХ-ын даргад горилж буй гурван хүн бий. Тодруулбал, Эдийн засаг хөгжлийн сайд Ж.Энхбаяр, Засгийн газрын Хэрэг эрхлэх газрын дарга С.Бямбацогт, Сангийн сайд Б.Жавхлан. Улс төрд, нам дотроо тэдний аль аль нь УИХ-ын даргаар сонгогдох боломжтой мөн намтар, түүхтэй. Тэдний аль аль нь Ерөнхийлөгчийн дэмжлэгтэй бөгөөд одоогийн УИХ дахь МАН-ын гишүүд дундаа олон удаа сонгогдсон, Засгийн газарт ажиллаж байсан гээд хамгийн боломжит хувилбарууд. Гэхдээ тэдний хэн нь ч байсан олонх талаас УИХ-ын даргаа авна гэсэн үг.

Улс төрд ажилласан жил, туршлагыг нь тооцож байгаа ч нэгэнт олонх талаас УИХ-ын даргаа томилохоор болсон бол тэдний нэг нь л нэр дэвших нь өнөөгийн нөхцөлд тохиромжтой. Өөрөөр хэлбэл, МАН-ын олонх талаас УИХ-ын даргад горилж буй Ж.Энхбаяр, С.Бямбацогт, Б.Жавхлан нар хоорондоо ойлголцож, нэгийгээ л дэмжээд явах нь өнөөдрийн нөхцөлд хамгийн чухал.

УИХ-ын чуулган нээлтээ хийснээс хойш хуралдаж чадаагүй, МАН-ын зодоон, Ардчилсан намын бойкотоос болоод УИХ-ын үйл ажиллагаа нь гацсан учраас дараагийн УИХ-ын даргаа хурдан томилоод ажилдаа орох нь нэн чухал байна. Тэгж байж цаг үеийн нөхцөл байдалтай холбоотой шийдвэрүүдийг яаралтай гаргаж, дараа дараагийн эдийн засагт үүсэх нөхцөлөөс хурдан гарах бодлого шийдвэрээ гаргаад явах нь нэн чухал байна.

Ш.ЧИМЭГ