МАН-ын Бага хурал амралтын өдөр хуралдаж, намын дарга Н.Учралыг Ерөнхий сайдад нэр дэвшүүлэв. Ингэснээр Н.Учрал Засгийн газраа бүрдүүлэх эрхтэй болов.

УИХ дахь Ардчилсан намын бүлгээс МАН-ын дарга Н.Учралыг УИХ-ын даргын ажлаа өгч, Ерөнхий сайдаар ажиллах ёстой гэсэн шаардлагыг тавьж, УИХ-ын чуулганы хуралдаанд оролцохгүй гэсэн. Мөн МАН-ын экс Ерөнхий сайд Л.Оюун-Эрдэнэ, УИХ-ын дарга асан Д.Амарбаясгалан тэргүүтэй МАН-ын гишүүд далд хэлбэрээр энэхүү бойкотыг “дэмжиж” УИХ-ын үйл ажиллагаа хэвийн үргэлжлэх боломжгүй болсон юм. Гэвч Пүрэв гаригаас эхлэн МАН-ынхан дотоод асуудалдаа анхаарч, тохиролцоо хийж эхэлсэн нь ийн Г.Занданшатарын Засгийн газрыг огцруулж, шинэ Засгийн газар байгуулахаар болж байна. Угтаа МАН анхнаасаа намын даргаа Ерөнхий сайдаар томилоод явах боломж байв. Гэвч тэд сонголтоо өөрчилснөөр өнөөдрийн энэ асуудал үүссэн.

Одоо шинээр байгуулах Засгийн газарт том ачаа ирж байна. Дэлхийн геополитикийн асуудлаас үүдэж дэлхийн эдийн засагт том шок ирэх хандлагатай, энэ нь ч улс орнуудад тулгараад эхэлсэн. Ялангуяа Монгол шиг стратегийн ач холбогдол бүхий шатахуунаа ОХУ-аас импортлодог улсын хувьд шатахууны үнэ нэмэгдэхээс өөр гарцгүй болсон. Монгол шиг жижиг эдийн засагтай улсын хувьд шатахууны үнэ нэмэгдвэл түүнийг дагаад бүх юмны үнэ өсч, иргэдийн амьдрал улам л хүндэрнэ. Тиймээс шинээр байгуулагдах Засгийн газар гадаад хүчний асуудал, дотоод улс төрийн нөхцөл байдлаа хангасан, ирэх өдрүүдэд үүсч болох олон эрсдэлийг иргэдийн амьдралд бага дарамт учруулахаар даван туулах төлөвлөгөө, гарц, хурд шаардлагатай. Улс төрийн хүрээнд шинээр байгуулагдах Засгийн газрыг УИХ дахь намуудтай хамтарч байгуулах ёстой гэж үзэх хүмүүс олон бий. Энэ нь аль нэг нам дангаараа асуудлыг шийдэхээс илүү улс орны эрх ашиг, иргэдийн амьжиргааг бодсон зөв бодлого хэрэгжүүлж, улс төржиж, талцаад суулгүй, хурдтай ажиллах хүлээлт бий болсон. Тиймээс ч Н.Учралыг АН, Үндэсний эвсэл, ХҮН, Иргэний зориг ногоон намуудтай хамтрах асуудлаа ярилцах шаардлага бий болж буйг ч хэлэх хүмүүс бий.

МАН, АН, ҮНДЭСНИЙ ЭВСЭЛ ХАМТАРСАН ЗАСАГ “БАЙГУУЛНА”

Хаврын чуулганы нээлттэй зэрэгцэн Ардчилсан намын бүлгээс УИХ-ын дарга Н.Учралыг Ерөнхий сайдаар ажиллах шаардлагыг тавьж, чуулганы хуралдаанд суухгүй гэдэг бойкот үргэлжилсэн. Мэдээж МАН олонхоороо ирцээ бүрдүүлээд явах хангалттай боломжтой, Засгийн газраа хамгаалаад үлдэх олонх хэдий ч МАН доторх хагарал ирц бүрдүүлэхгүй, Ардчилсан намын шаардлагыг “далд” хэлбэрээр дэмжиж байсан гэх.

Гэхдээ улс төрийн хүрээнд энэ бүх үйл явдлыг цаанаа Н.Учрал болоод МАН-ын зарим гишүүд “дэмжиж” байсан, АН анхнаасаа Н.Учралтай тохиролцсон гэх яриа ч өрнөсөн. Н.Учрал намын даргаа авсны дараа Г.Занданшатарыг Ерөнхий сайдаар томилж, Засгийн газар бүрдүүлэхэд энэ Засгийн газрын 2026 оны наадам хүртэл тогтвортой байлгахаар тохирч, түүний дараа Н.Учрал Ерөнхий сайдаа авч, Г.Занданшатар Ерөнхийлөгчийн сонгуульд нэр дэвших “тохироотой” байсан. Тиймээс энэ бүх нөхцөл байдал цаг хугацааны хувьд наашилж, Ерөнхийлөгчийн өргөн барьсан гишүүдийг эгүүлэн татах хууль, Л.Оюун-Эрдэнэ, Д.Амарбаясгалан нартай муудалцсан зэргээс болж өөрчлөгдсөн. Н.Учралын Засгийн газраа МАН байгуулахдаа Ардчилсан нам, Үндэсний эвсэл гэсэн нэгдлээр байгуулах тохироо ч улс төрд хийгдсэн гэх. Өөрөөр хэлбэл, дахин байгуулагдах Засгийн газарт Ардчилсан нам, Үндэсний эвслийн тэргүүн Н.Номтойбаяр нар орж ажиллах, Засгийн газрын сайд нарын тоогоо цөөлөх, дэд сайд наргүй ажиллахаар тохиролцсон гэсэн мэдээлэл ч бий.

Гадаад хүчин зүйлээс шалтгаалж байгаа дотоодын эдийн засгийн нөхцөл, шатахууны өсөлт, иргэдийн амьдралд бага нөлөө үзүүлэх, эдийн засагт ирэх том шокийг яаж даван туулах гээд хүндхэн сорилттой тулж буй Н.Учралын Засгийн газар энэ өдрүүдэд байгуулагдана. Одоо талцаж, хуваагдаж, улстөржиж, дотооддоо тэмцэлдэж суухаас илүү улс орны эдийн засаг, иргэдийн амьжиргааг сайжруулахад анхаарах чухал цаг үе, чухал шийдвэрүүдийг олон нийт хүлээж буй. Монгол Улсын Ерөнхий сайдад нэр дэвшиж буй Н.Учрал дарга аа одоо албан тушаал булаацалдаж, улстөржих цаг биш шүү.