Байгуулагдаад 100 гаруй хоногтойгоо золгож байгаа Г.Занданшатарын Засгийн газрын хоёр сайд өөрийн хүсэлтээр ажлаа өгч, дараагийн хоёр сайдаа томилохоор бэлтгэж буй. Гэвч УИХ-ын чуулганы ирц хүрэхгүй байгаа тул шинээр томилохоор өргөн барьсан хоёр сайдаа тангараг өргүүлж чадахгүй байна. Тодруулбал, Боловсролын сайдаар УИХ-ын гишүүн Л.Энх-Амгаланг, Эрчим хүчний сайдаар Б.Найдлааг тус тус томилохоор УИХ-д тангараг өргүүлэхээр хүлээгдэж байгаа ч чуулган хуралдаж чадахгүй, ирц бүрдэхгүй нэг долоо хоногийн үдэж байна.

Яг энэ үйл явцтай зэрэгцээд Хууль зүй, дотоод хэргийн сайд Б.Энхбаярыг АТГ-т УИХ-ын гишүүн Л.Оюун-Эрдэнэ өгөв.

Ингэхдээ 1,3 сая ам.долларын авлигыг Б.Энхбаяр авсан бөгөөд энэ хэрэг гэрчтэй, баримттай, бичлэгтэй гэдгийг хэлсэн. УИХ-ын гишүүн Л.Оюун-Эрдэнэ “Энд ирсэн миний гол зорилго нэг. Тэр хүрээндээ асуудлыг хөндөж ярихыг хүсэж байна. Нэг сэдвийг хөндөхөд өөр агуулга руу чиглүүлэх оролдлогууд гарч байгаа учраас бодит асуудлыг бодитоор нь ярих нь зүйтэй гэж үзэж байна. Бусад улс төрийн шинжтэй асуудлыг холбогдох түвшинд нь ярих нь зөв. Өнөөдөр би нийт 894 хуудас материалыг бэлтгэн Авлигатай тэмцэх газарт хүлээлгэн өгөх гэж байна. Нэгдүгээрт, "Бодь"-той холбоотой оффтейк гэрээний асуудал, хоёрдугаарт, нүүрсний сонсголтой холбоотой асуудлууд, гуравдугаарт, Б.Энхбаярын авлигын шинжтэй байж болзошгүй асуудлууд болон холбогдох гэрч, нотлох баримтууд, дөрөвдүгээрт, Б.Энхбаяртай холбоотой бусад авлигын асуудлуудыг тус тус багтаан дөрвөн бүлэгт хуваасан болно. Б.Энхбаяр нь "Бодь Интернэшнл" ХХК-ийн захирал Д.Баясгалантай хоёр хүний хамт дөрвүүлээ уулзах үеэрээ нэг удаад 500 мянган ам.доллар, дараагийн удаад 800 мянган ам.доллар буюу нийт 1.3 сая ам.долларыг бэлнээр авсан байж болзошгүй талаар мэдээлэл байна. Энэхүү асуудлыг гэрчүүд холбогдох баримтын хамт надад мэдүүлсэн бөгөөд уг материалыг өнөөдөр Авлигатай тэмцэх газарт хүлээлгэн өгч байна" хэмээн мэдэгдсэн. Одоо Авлигатай тэмцэх газар Л.Оюун-Эрдэнийн өгсөн авлигатай холбоотой асуудлыг шалгаж, тогтоох ажил үлдэж байна.

Хууль зүй, дотоод хэргийн сайд Б.Энхбаярын хувьд энэ бүх үйл явдлыг гүтгэлэг гэж тайлбарлаж байгаа. Гэвч ийм өндөр хэмжээний авлигын асуудалд нэг улсын Хууль зүй, дотоод хэргийн сайд нь холбогдож байгаа нь өөрөө ёс зүйгүй үйлдэл юм.

Парламент нь соёлтой, засаглал нь сайн, улстөрчид нь ёс зүйтэй улсад бол Б.Энхбаяр аль хэдийн уучлал гуйгаад ажлаасаа чөлөөлөгдчихсөн байгаа. Шударгын дүрд тоглодгоороо бол тэр өөрийн хүсэлтээр чөлөөлөгдөөд шалгуулаад, гэм буруугаа шүүлгэж байх учиртай. Хууль зүй, дотоод хэргийн сайд Б.Энхбаяр өөрийгөө шударга үнэний төлөө зүтгэдэг, заримдаа бүр шударга үнэний илд болж явдаг хэмээн тодорхойлдог учраас гэм буруутай эсэхээ хуулийн байгууллагаар шалгуулчих эр зориг ч бас түүнд байгаа биз ээ. Гэм буруугүй бол эргээд Хууль зүй, дотоод хэргийн сайдынхаа ажлаа хийх эрх нь нээлттэй л байгаа.

Ерөнхий сайдын зүгээс ч Засгийн газрын нэр хүнд унагаж байгаа сайд нартаа анхааруулга өгч, заримд нь ажлаа хийх 100 хоногийн анхааруулга өгч байсан бөгөөд авлига, албан тушаалын гэмт хэрэгтэй нэр холбогдсон  сайд нараа ажлаа өгөөд шалгуулахыг ч сануулсан гэх мэдээлэл бий. Ийнхүү Г.Занданшатарын Засгийн газар хоёр сайдынхаа араас дахин Хууль зүй, дотоод хэргийн сайдыг чөлөөлөх үү гэдэг сорилттой тулгарав.

Ш.ЧИМЭГ