УИХ дахь МАН-ын бүлгээс өнөөдөр /2026.03.23/цаг үеийн асуудлаар мэдээлэл хийлээ. Энэ үеэр Гэр бүл хөдөлмөр , нийгмийн хамгааллын сайд Т.Аубакир Хувийн нэмэлт тэтгэврийн тухай хуулийн төслийн талаар  мэдээлэл өгөв.

Гэр бүл хөдөлмөр , нийгмийн хамгааллын сайд Т.Аубакир: 

-Хувийн нэмэлт тэтгэврийн тухай анхдагч хуулийн төсөл Засгийн газар дээр дэмжигдээд УИХ дахь МАН бүлэгт танилцуулаад мөн дэмжигдлээ. Уг хууль нь Монгол Улсын урт дунд хугацааны хөгжлийн бодлого хөтөлбөрт тэтгэврийн даатгалыг олон давхрагад тогтолцоонд шилжүүлэх, ахмад настан олон эх үүсвэр бүхий тэтгэврийн орлоготой байх нөхцөлийг бүрдүүлэх зорилготой. Түүнчлэн хувийн тэтгэврийн хуримтлалд хамрагдах иргэдийн оролцоо нэмэгдэнэ. Өнөөдрийн байдлаар 135 мянга орчим иргэн хувийн нэмэлт тэтгэврийн хэлбэрээр даатгуулагч болсон. Одоогоор 80 гаруй тэрбум төгрөгийн хуримтлал үүссэн. Гэтэл үүнийг зохицуулж байгаа хууль эрх зүйн орчин манай улсад байхгүй. Тиймээс уг хууль батлагдсанаар эдгээр 135 мянга орчим иргэдийн эрхийг хамгаална. Мөн хувийн нэмэлт тэтгэврийн санд даатгуулах хүсэлтэй иргэд жилээс жилд өсөж байгаа. Эдгээрийн мөн эрх ашгийг хамгаалах зорилготой. Дээрээс нь уг хууль батлагдсанаар ААН-үүд хүний нөөцийн шинэ бодлого хэрэгжүүлэх, ажилтнаа тогтвортой ажиллуулах боломж бүрдэнэ. Хувийн тэтгэврийн санд төвлөрсөн мөнгийг бусад салбар руу хөрөнгө оруулалт хийх боломжтой болно. Мөн иргэдийн хувьд хувийн нэмэлт тэтгэврийн хуримтлал үүсгэж хуримтлалаасаа нэг удаа сонгож эсвэл насан туршдаа тэтгэвэр авна, мөн өвлүүлэх, иргэн тэтгэврийн наснаас өмнө хөдөлмөрийн чадвараа алдсан тохиолдолд тэтгэвэр тогтоолгох боломжтой болно.

УИХ МАН-ын бүлгийн дарга Ж.Батжаргал:

-МАН-ын бүлгийн өнөөдрийн хуралдаанд 52 гишүүн оролцлоо. УИХ-ын даргын өмнөд хөршид хийж буй төрийн айлчлалд 12 гишүүн оролцож байгаа эдгээр гишүүд цахимаар оролцож байгаа. МАН-ын бүлгийн хувьд Улсын Их Хурлын үйл ажиллагааг хэвийн явуулах нөхцөлийг хангаж ажиллана. Ирэх Пүрэв, Баасан гаригийн чуулган хэвийн явагдах ёстой. Улс төрийн хүчнүүдэд хэлэхэд ямар нэг саналын зөрүүтэй асуудал байж болно. Тухайлсан асуудлаа ярьж УИХ-ын дэгийн тухай хуулийн дагуу завсарлага авах хэрэгтэй. Түүнээс бүлгээрээ улс төрийн барьцаа хийж, чуулганд суухгүй байж болохгүй, тийм зохицуулалт байхгүй.

Хувийн нэмэлт тэтгэврийн тухай анхдагч хуулийн төсөл нь анх удаа ярьж байгаа зүйл биш. Хоёр жилийн өмнөөс яригдсан. Тэтгэвэр авагчдад олон эх үүсвэрээр тэтгэвэр авах боломжийг бүрдүүлэх, Үндэсний хуримтлалын системийг бий болгох, үүнийгээ үндэсний томоохон бүтээн байгуулалт руу эх үүсвэр болгож ашиглах, шимтгэл төлөгч нарт баталгаат өгөөж өгдөг байх асуудлыг шийдэх юм. Татвар, шимтгэл төлөгчдийн хуримтлуулсан хөрөнгийг өвлүүлдэг байх ёстой. Үүнд Санхүүгийн зохицуулах хороо холбогдох мэргэжлийн байгууллагуудын хамтарсан судалгаа тооцооллууд хууль хоорондын нийцлийг хангаж ажиллах нь чухал гэлээ.

Бүлгийн хуралдаанаар хэлэлцсэн хоёр дахь асуудал нь УИХ-ын гишүүдэд зориулсан E.parliament.mn платформын танилцуулгыг УИХ-ын Тамгын газраас хийсэн. "E-Parliament" платформ нь зөвхөн технологийн шинэчлэл төдий бус, парламентыг иргэддээ ойртуулах, УИХ-ын гишүүдийн өдөр тутмын ажлын төлөвлөлт, хууль тогтоомжийн төсөл боловсруулах, батлах үйл явц, санал бүртгэх, хуралдааны тэмдэглэл хөтлөх зэрэг олон үйл ажиллагааг цахимжуулсан төдийгүй УИХ-ын гишүүдийн шийдвэр гаргалтыг ил тод, үнэн бодит мэдээлэлд үндэслэх боломжийг бий болгож байгааг тодотгосон. Дээрх платформыг ашигласнаар их өгөгдөлд суурилсан 17 төрлийн 200 мэдээлэл харах боломж бүрдэнэ гэдгийг УИХ-ын Тамгын газраас танилцуулжээ.