МАН-ын Хяналтын ерөнхий хороо наймдугаар сарын эхээр хуралдаж, “60 тэрбумын бичлэг”-тэй нэр холбогдсон Ц.Сандуй, М.Энхболд, А.Ганбаатар нарт ёс зүйн хариуцлага тооцох нь зүйтэй гэж үзсэн. Ингэхдээ Ц.Сандуй, А.Ганбаатар нарыг МАН-ын Бага хурлын гишүүнээс чөлөөлөх тухай асуудлыг харьяа намын байгууллагад нь тавьж, УИХ-ын дарга М.Энхболдод ёс зүйн хариуцлага тооцох асуудлыг Удирдах зөвлөлд хүргүүлэхээр болсон юм.

Тэгвэл МАН-ын гишүүн А.Ганбаатар нэгэн хэвлэлд өгсөн ярилцлагадаа “МАН-ын Бага хурлын гишүүн биш” гэдгээ тодотгосон юм. Ингээд Хяналтын ерөнхий хорооны шийдвэр хэрхэн хэрэгжиж байгааг тус хорооны дарга Д.Батбаатараас тодруулахад “Манай Хяналтын ерөнхий хорооноос гаргасан тогтоолд “хөөнө” гэсэн нэг ч үг байхгүй. “60 тэрбумын бичлэг”-т нэр холбогдсон гишүүдэд хариуцлага тооцох асуудлыг харьяа намын байгууллагад хүргүүлсэн. Ингээд тухайн байгууллага нь дүрмийн дагуу хариуцлага тооцох асуудлыг хэлэлцэх учиртай” гэсэн юм.

Т.НОМИН