УИХ-ын сонгуульд үнэмлэхүй олонх болсон МАН хоёр дахь Засгийн газраа байгуулаад хэдийнэ 100 гаруй хоножээ. Энэ хугацаанд Г.Занданшатарын танхим цэгцрэх хөдөлгөөн өрнүүлж буй ч олон нийтийн зүгээс зарим салбарын сайд нь сайн ажиллахгүй байгаа учраас хариуцлагын асуудлыг хөндөж буй. Тиймээс ч хоёр ч танхимын сайд нь чөлөөлөгдөх хүсэлтээ өгч, тэдний орны сайдуудыг томилохоор болсон. Тодруулбал, Боловсролын сайд П.Наранбаяр, Эрчим хүчний сайд Б.Чойжилсүрэн нар өөрсдийн хүсэлтээр чөлөөлөгдөх хүсэлтээ өгсөн бол тэдний оронд МАН-ын гишүүн, УИХ-ын гишүүн Л.Энх-Амгаланг Боловсролын сайд, ХҮН намын дарга Б.Найдлааг Эрчим хүчний сайдаар томилохоор чуулганы хуралдаанд тангараг өргүүлэхээр бэлтгэж буй.

Хэрэв Г.Занданшатарын танхим шүд сугалах буюу зарим сайд нартаа хариуцлага тооцохгүй бол бүрэн бүрэлдэхүүнээрээ огцрох эрсдэлтэй тулаад буй. Мэдээж, намын дарга биш, УИХ-ын гишүүн ч биш Г.Занданшатарын Засгийн газар ажил явуулахад улс төрийн хувьд олон хүндрэлтэй нүүр тулж буй. Энэ шалтгаан нь хамгийн эмзэг Засгийн газар болгож буй.

Засгийн газар ажил хийгээгүй биш хийж байгаа гэхдээ улс төрийн хувьд хэзээ ч уначих эмзэг эрсдэл үргэлж л отож байгаа. Улс төрийн хүрээнд ч энэ Засгийн газрыг анх байгуулагдахад л богинохон настай гэж тодорхойлж байсан нь нууц биш. МАН дотор өрнөсөн тохироогоор бол Г.Занданшатарын Засгийн газар 2027 оны Ерөнхийлөгчийн сонгууль дөхөөд унаж, МАН-ын дарга Н.Учрал Засгийн газраа байгуулах тохиролцоотой байв. Гэвч Монгол Улсын Ерөнхийлөгчөөс өргөн барьсан УИХ-ын гишүүдийг эгүүлэн татах хууль, экс намын дарга Л.Оюун-Эрдэнэ, УИХ-ын дарга Д.Амарбаясгалан нарын зөрчил өмнө нь тохиролцсон улс төрийн цагийн зүүг хурдлуулчихлаа. Тиймээс энэ хаврын чуулгантай зэрэгцээд УИХ дахь МАН-ын гишүүд хоёр хуваагдаж, нэг хэсэг нь Н.Учралын тал нөгөө хэсэг нь экс намын дарга Л.Оюун-Эрдэнийн гэсэн хоёр тал болон хуваагдчихсан. Тиймээс ч чуулганы хуралдааныг хуралдуулахгүй, ирц бүрдэхгүй байсаар байна.

Өөрөөр хэлбэл, чуулганы хуралдаанаар Г.Занданшатарын Засгийн газрын хоёр сайдыг томилж, тангараг өргүүлж чадахгүй, УИХ-аар хэлэлцэх байсан олон асуудал гацаатай явсаар байвал МАН дотооддоо ширээний хоёр талд суухуу эсвэл хагарал улам гүнзгийрэх үү гэдэг дээрээ тулж ирнэ.

Нөгөөтэйгүүр Г.Занданшатарын Засгийн газрыг огцруулах акц УИХ дотор ч өрнөөд эхэлсэн. УИХ-ын дарга Н.Учралыг ажлаа өгөхийг Ардчилсан нам шаардаад байгаа бол Үндэсний эвслийн тэргүүн Н.Номтойбаяр ч Ерөнхийлөгчийн хуулийг эсэргүүцэж буйгаа илэрхийлээд байгаа.  УИХ дахь Ардчилсан намын бүлгээс МАН-ын дарга Н.Учралыг спикерийн ажлаа өгөөд, гүйцэтгэх засаглалын ажлаа хий гэсэн нь ч цаанаа учиртай. Хэрэв Н.Учрал намын даргын хувьд Ерөнхий сайдын ажлаа хийх ёстой бол Г.Занданшатарын танхим огцорно гэсэн үг. УИХ-ын гишүүн биш, намд өндөр албан тушаалгүй Г.Занданшатарын хувь заяа илүү бүрхэг болж, Засгийн газар бүрэн бүрэлдэхүүнээр огцрох асуудал хөндөгдөнө. Ардчилсан нам ч МАН-ын дарга Н.Учрал ч үүнийг мэдэж, бас уншиж л байгаа. Гэхдээ улс төрийн хүрээнд Ардчилсан намыг Н.Учралтай тохиролцож, дараагийн Засгийн газарт хамтрахаар тохирсон гэх яриа ч үнэний ортой байж мэднэ. 2024 оны сонгуулийн үр дүнд байгуулагдсан парламент тангараг өргөсний дараа МАН, АН, ХҮН гэсэн хамтралаар Засгийн газар байгуулсан байдаг. Энэ үед хэд хэдэн томоохон төсөл хөтөлбөрүүдийг хөдөлгөж чадсан гэж олон нийт дүгнэдэг. Тиймээс хэрэв Г.Занданшатарын Засгийн газар огцорвол дараагийн Засгийн газарт Ардчилсан нам хамтрахыг үгүйсгэх аргагүй.

Парламентад суудалтай намууд чуулганы хуралдаа суухгүй, Ардчилсан намын шаардлагыг дэмжиж байвал Г.Занданшатарын Засгийн газрын хувь заяа шүд сугалснаар шийдэгдэхгүй л болов уу.

Тиймээс МАН-ын дарга Н.Учрал парламентад суудалтай намуудтай хэлэлцээрийн ширээнд суух уу эсвэл өрнөж буй улс төрийг урсгалаар нь өрнүүлж, далдаас дэмжээд суугаад байх уу гэдгээс олон зүйл шалтгаалахаар байна.

Ш.ЧИМЭГ