ОХУ-ын ерөнхийлөгч Владимир Путин болон Герман улсын канцлер Ангела Меркель нар өнгөрсөн бямба гаригт /2018.08.18/ уулзахаар товлосны дагуу уулзав. Тэдний уулзалт Герман улсын нийслэл Берлин хотоос зайтай орших Мессэбэрг ордонд болж, уулзалтаар балтын тэнгист тавигдах байгалийн гаазийн хоолойгоос гадна өөр олон тулгамдсан асуудлын тухай хэлэлцэхээр төлөвлөж байгаа талаар дэлхийн хэвлэлүүд мэдээлж байсан. Тэгвэл албан ёсны уулзалт эхлэхээс өмнө ОХУ-ын ерөнхийлөгч Владимир Путин болон Ангела Меркель нар Сирийн хямрал мөн Украины нөхцөл байдлын тухай санал бодлоо солилцжээ.
“Бид Сири улсад үзүүлэх хүмүүнлэгийн тусламжийг эрчимжүүлж хэрэгтэй байна. Өөрөөр бол эх орноосоо дүрвэн зугтсан Сири улсын иргэдийг нутаг буцаахад бүхий л тусламжийг үзүүлэх шаардлагатай” хэмээн ерөнхийлөгч Владимир Путин ярьжээ.

Одоогийн байдлаар арабын Йордан, Ливан улсуудад Сирийн нэг сая дүрвэгч байгаа бөгөөд гурван сая дүрвэгч Турк улсад байгаа талаар албаны эх сурвалжууд мэдээлсэн. 2015 оноос хойш Герман улс нь Сирийн зуун мянга гаруй дүрвэгчийг хүлээн авсан нь Европын холбоонд сөргөөр нөлөөлж гишүүн улс орнуудын эв түнжин муудахад хүргэсэн. Ангела Меркелийн Европын холбоонд эзлэх байр суурь ч буурсан юм. “Сирийн дүрвэгсдийн асуудал Европт том дарамт болж байна. Үүнийг бид таслан зогсоохын тулд Сири улсын дэд бүтцийг сэргээн засварлаж дүрвэгчдийг эх орондоо харих таатай боломжийг нь бүрдүүлэх хэрэгтэй” гэж ОХУ-ын ерөнхийлөгч Владимир Путин онцолжээ. Ангела Меркель Путинтай санал нийлж буйгаа илэрхийлээд,  Сири улсад дахин эмх замбараагүй байдал гаргахгүйн тулд хичээн ажиллах талаар мэдэгдсэн байна.

Мөн тэд Украин улсын зүүн бүсэд болж буй хямралын талаар санал бодлоо хуваалцжээ. 2015 онд Беларус улсын Минск хотноо болсон Орос, Герман, Украин улсын эрх баригчдын байгуулсан зэвсэгт сөргөлдөөнийг зогсоох гэрээ үр дүнгүй байгааг Меркель онцолжээ. Гэвч Нэгдсэн үндэстний байгууллагын /НҮБ/ одоо хэрэгжүүлэх гэж байгаа даалгавар сөргөлдөөнийг зогсооход нөлөөлж магадгүй хэмээн Ангела Меркель, Владимир Путинтай санал бодлоо хуваалцжээ. “Украины хямралыг зогсоох гэж байгаа НҮБ-ын даалгавар амжилттай болно гэдэгт би итгэж байна. Бид МИНСК гэрээг шинэчлэх арга зам хайж байгаа” гэж Германы гадаад харилцааны сайд Хейко Маас Die Welt сонинд саяхан өгсөн ярилцлагадаа дурдаж байжээ.
ОХУ-ыг Киев болон бусад барууны орнууд Украинд болсон сөргөлдөөний босогчдыг зэр зэвсгээр хангаж байсан хэмээн сэжиглэдэг боловч үүнийг эрс үгүйсгэдэг байна.

Түүнчлэн ОХУ болон Герман улсууд эдийн засгийн салбарт хамтын харилцаагаа сайжруулахаар Nord Stream хоёр төслийн тухай албан ёсны уулзалтын үеэр хэлэлцэх бөгөөд хэлэлцээрийн гол сэдэв болно хэмээн улс төрийн ажиглагчид үзэж байна. “Nord Stream 2” ОХУ, Герман улсуудыг холбосон байгалийн хий дамжуулах хоолойг Балтын тэнгист байгуулах төсөл юм. Герман улс Украиныг байгалийн хий дамжуулагч орон болгох хүсэлтэй байгаа боловч болж буй сөргөлдөөний улмаас хэрэгжүүлэх таатай нөхцөл бүрдэхгүй байгаа билээ. “Миний бодлоор Украин улс байгалийн хий дамжуулах төсөлд гол үүрэгтэй” хэмээн Меркель хэлсэн бол Владимир Путин Европын улс орнуудыг эрчим хүчний хэрэглээ шаардлага өсч байгаа талаар шүүмжилсэн аж. “Nord Stream 2′ төсөл бол хоёр талын эдийн засагт эергээр нөлөөлөх болно.Тиймдээ ч Украин улсаар байгалийн хийг дамжуулах боломжийг бүрэн хааж байгаа хэрэг биш” хэмээн ОХУ-ын ерөнхийлөгч Владимир Путин ярьжээ. Урьд нь ОХУ Украин улс руу байгалийн хий нийлүүлэлтээ зогсоож байсан бөгөөд Европын холбооны улсуудад нөлөөлж байсан удаатай аж.

Эх сурвалж: Guardian, NY
Г. Батмандах