НЭМЭЛТ: 

Боловсролын сайд П.Наранбаяр чөлөөлөгдөх хүсэлтээ гаргасан тул МАН-аас түүний оронд УИХ-ын гишүүн Л.Энх-Амгаланг нэр дэвшүүлсэн байна. Энэ талаар Засгийн газрын Хэрэг эрхлэх газрын дарга С.Бямбацогт мэдэгдлээ. УИХ-ын гишүүн Л.Энх-Амгалан нь 2012 оны УИХ-ын сонгуулиас эхлэн парламентад дөрвөн удаа дараалан сонгогдсон, Боловсрол, шинжлэх ухааны сайдаар 2016-2020 оны хооронд ажиллаж байв. Харин 2024-2025 оны хооронд Гэр бүл хөдөлмөр нийгмийн хамгааллын сайдаар ажиллаж байгаад Л.Оюун-Эрдэнийн танхим огцорсноор сул гишүүн болсон юм.

П.Ганзориг, Б.Найдалаа нарыг Эрчим хүчний сайдад нэр дэвшүүлсэн

Эрчим хүчний сайдад ХҮН намаас УИХ-ын гишүүн П.Ганзориг, Б.Найдалаа нарыг нэр дэвшүүлжээ. Үндсэн хуульд заасны дагуу Ерөнхий сайд Г.Занданшатар тэднээс нэгийг нь сайдаар сонгох юм.

Энэ талаар ХҮН намын дарга, Шадар сайд Т.Доржханд өнөөдөр сэтгүүлчдэд мэдээлэл өгөх үеэрээ "ХҮН намын зөвлөл өчигдөр хуралдсан. УИХ-ын гишүүн, ХҮН намын УИх дахь зөвлөлийн дарга П.Ганзориг, УИХ-ын гишүүн Б.Найдалаа нарын хооронд хэлэлцүүлэг явсан, өнөөдрийн байдлаар холбогдох хүмүүсийнхээ нэрсийг өгсөн. Ерөнхий сайд өөрөө Үндсэн хуульд заасны дагуу  шийдвэрээ гаргаад явна. Бид намынхаа байр суурийг илэрхийлсэн. Надад Эрчим хүчний сайд болох санал ирээгүй" гэлээ.