Монголын үйлдвэрчний эвлэлийн холбооны удирдлагууд тус холбооны үйл ажиллагааг гажуудуулж байгаа талаар Нийгмийн даатгалын үндэсний зөвлөлийн гишүүн Б.Баяраа мэдээлэл хийв.  

Тэрбээр "Нийгмийн даатгалын үндэсний зөвлөл нийгмийн даатгалын байгууллагын бодлого чиглэлийг хангуулж байдаг удирдах байгууллага, гэхдээ орон тооны бус байгууллага. Даатгуулагчийг төлөөлсөн үйлдвэрчний эвлэл нэр дэвшүүлэх үйл ажиллагаанд өөрсдийнхөө гурван хүнийг нэр дэвшүүлдэг. Дараа нь Байнгын хороогоор сонгон шалгаруулалт хийж, УИХ-аар орж дэмжигдвэл Нийгмийн даатгалын үндэсний зөвлөлийн гишүүн болж, зургаан жилээр сонгодог. Гэтэл  УИХ-аас бүрэн эрхийн хугацааг зургаан жилээр олгосон байхад миний сонгогдох эрхэнд халдсан. Тодруулбал, МҮЭХ-ноос намайг тэтгэвэртээ суусан гээд эгүүлэн татаж, гишүүн байхаа болиогүй байхад сонгон шалгаруулалт хийж байна. Хэрвээ гэмт хэрэг хийсэн, нийгмийн даатгалын мөнгөнөөс завшсан бол эгүүлэн татах ёстой. Гэтэл миний хувьд тийм асуудал гаргаагүй. Надаас өөр тэтгэврийн насны гишүүн бий. Гэтэл МҮЭХ хоёрыг нь ялгаварлаж Нийгмийн даатгалын үндэсний зөвлөлийн гишүүнээс эгүүлэн татсан. Энэхүү хүний эрхийг зөрчсөн үйлдлийг хууль хяналтын байгууллагад хандан шалгуулна" гэдгээ илэрхийлэв.