Нэмэлт 15:12

Олон нийтийн цахим сүлжээнд нийтлэгдсэн өсвөр насны хүүхдүүдтэй холбоотой хэргийн талаар Сүхбаатар дүүргийн прокурорын газраас тодруулахад "2026 оны гуравдугаар сарын 9-ны өдөр бүртгэгдсэн үе тэнгийн дээрэлхэлтийн хэрэгт холбогдсон нэр бүхий таван хүүхдийг насанд хүрээгүй хохирогчийн биед нь халдаж, хүч хэрэглэсэн үндэслэлээр яллагдагчаар татан, мөрдөн шалгах ажиллагаа явуулж байна.

Мөн нэг хүүхдэд нь Монгол Улсын хилээр гарахыг хязгаарлах, нэр бүхий хүмүүстэй уулзахыг хориглох хязгаарлалт тогтоох, таслан сэргийлэх арга хэмжээ авсан.

Сүхбаатар дүүргийн прокурорын газраас гэмт хэрэг гаргахад нөлөөлсөн шалтгаан, нөхцөлийг арилгуулах, дахин гэмт хэрэг үйлдэгдэхээс сэргийлэх зорилгоор “Ш…” ХХК-д прокурорын мэдэгдэл хүргүүлсэн. Улмаар тухайн компани хэрэг болсон худалдааны төвийн аваарын шатны хэсгийг битүүмжилж, хөдөлгөөнийг хязгаарлаж, байнгын хараа хяналттай болгосон” гэлээ.

Олон нийтийн сүлжээнд 2026 оны гуравдугаар сарын 9-нд цацагдсан өсвөр насны хүүхдүүд нэгнийгээ бүлэглэн зодож буй бичлэгийн мөрөөр цагдаагийн байгууллагаас мөрдөн шалгах ажиллагаа явуулсан. Уг хэрэгт төрийн болон хувийн хэвшлийн сургуулийн нийт найман сурагч холбогдсон болохыг цагдаагийн байгууллагаас албан ёсоор мэдээлж байв. Өнөөдрийн байдлаар нэр бүхий хүүхдүүдэд эрүүгийн хэрэг үүсгэн, яллагдагчаар татах саналтайгаар хэргийг прокурорын байгууллагад шилжүүлсэн аж.

Мөн хэрэгт холбогдогч Д.С-г яллагдагчаар татаж Монгол Улсын хилээр гарахыг хязгаарлах, таслан сэргийлэх арга хэмжээ авчээ. Тодруулбал Эрүүгийн хуулийн тусгай ангийн 13.5 дугаар зүйлийн хоёр дахь хэсгийн 2.1 дэх заалт, 13.11 дүгээр зүйлийн хоёр дахь хэсгийн 2.1 дэх заалтад үндэслэн яллагдагчаар татжээ.

Хууль хяналтын байгууллагын мэдээлж буйгаар өсвөр насныхны дундах үе тэнгийн дээрэлхэлт жил ирэх тусам нэмэгдэх хандлагатай байгааг дурдсан. Тухайлбал, 2026 оны эхний хоёр сарын байдлаар 150 гаруй хүүхэд энэ төрлийн хүчирхийлэл, дээрэлхэлтэд өртсөн гэх тоо баримт гарчээ. Үүнтэй холбогдуулан төрийн болон хувийн хэвшлийн сургуулиуд сурагчдыг дээрэлхэлтээс хамгаалах, урьдчилан сэргийлэх ажлыг зохион байгуулж байна. Сургуулийн захиргаанаас сурагчидтай ил болон далд хэлбэрээр уулзалт зохион байгуулж, хүүхэд бүрийг дээрэлхэлтийн хохирогч болсон эсэхийг тогтоохоор ажиллаж байгаа аж.

Тухайлбал, Баянзүрх дүүргийн дөрөвдүгээр хороонд байрлах 97 дугаар сургууль дээрэлхэлтийг илрүүлэх зорилгоор цахим асуулгыг сурагчдын дунд явуулж эхэлжээ.

Энэхүү цахим асуулга нь хүүхдүүд өөрт тохиолдсон болон бусдад ирж буй дарамт, шахалтын талаар далд хэлбэрээр мэдээлэх боломжийг тус сургуулиас нийт сурагчдад олгож байгаагаараа онцлог юм.