Энэ оны эхний хоёр сарын байдлаар инфляц 6.5 хувь болж буурсан үзүүлэлт гарчээ. Статистикийн хувьд инфляц багассан мэт харагдаж байгаа ч иргэдийн өдөр тутмын амьдралд энэ өөрчлөлт төдийлөн мэдрэгдэхгүй хэвээр байна. Учир нь зах, дэлгүүр дээрх өргөн хэрэглээний бараа, ялангуяа хүнсний үнэ буураагүй байгаа юм.

Тухайлбал, өрхийн зардлын хамгийн том хэсгийг эзэлдэг хоол хүнсний үнэ 12.3 хувиар өссөн нь нийт инфляцын дундаж үзүүлэлтээс бараг хоёр дахин өндөр байна. Өөрөөр хэлбэл инфляц буурсан гэж байгаа ч иргэдийн хувьд "хоолны үнэ" өндөр хэвээр байна.

Мөн зарим үйлчилгээний үнэ ч нэлээд өссөн байна. Үүнд:

• Боловсролын үйлчилгээ – 12.8 хувь
• Зочид буудал, нийтийн хоол – 10.6 хувь
• Хувцас, гутал – 6.5 хувь
• Эм, тариа, эмнэлгийн үйлчилгээ – 6.2 хувь

Эдгээр нь дундаж инфляцад багтдаг ч иргэдийн өдөр тутмын амьдралд шууд нөлөөлдөг зардлууд юм. Нөгөө талд орлогын өсөлт инфляцтай зэрэгцэж чадахгүй байвал хүмүүсийн худалдан авах чадвар буурсаар байх нь ойлгомжтой. Цалин өсөхгүй байхад хүнс, үйлчилгээний үнэ нэмэгдэх нь өрхийн санхүүд илүү дарамт учруулж байна.

Тиймээс инфляц буурсан гэх статистик нь эдийн засгийн тодорхой эерэг дохио байж болох ч энэ нь иргэдийн амьдрал шууд сайжирсан гэсэн үг биш юм. Хүнсний үнийн өсөлт, өрхийн хэрэглээний бүтэц, орлогын өсөлтийн хурд зэрэг хүчин зүйлсийг хамтад нь авч үзэж байж инфляцийн бодит нөлөөг ойлгох боломжтой.

Өнгөрсөн нэгдүгээр сарын 19-нд УИХ-ын дарга Н.Учрал Төв банкинд хийх хяналт, шалгалтын асуудлаар Ерөнхий аудитор болон Монголбанкны Ерөнхийлөгчтэй уулзсан. Энэ үеэр инфляцыг бууруулах, үнийн хөөрөгдлийг барих чиглэлээр 16 багц арга хэмжээг судалж, УИХ-ын тогтоол болгохоор ажиллаж байгааг дурдсан юм. Тус ажлын хэсгийг УИХ-ын гишүүн Х.Тэмүүжин ахалж байгаа аж.

Тэрбээр “Хэрэв бид үүнд дорвитой арга хэмжээ авахгүй бол иргэдийн амьдрал улам хүндэрнэ. Энэ ажлыг хэрэгжүүлэхэд Монголбанк гол үүрэгтэй. Мөнгөний бодлого төсвийн бодлоготой уялдаж ажиллах ёстой” гэдгийг хэлж байв.

Харин Монголбанкны ерөнхийлөгч С.Наранцогт “Мөнгөний хатуу бодлогыг жил орчим хугацаанд хэрэгжүүлсэн ч инфляц өндөр хэвээр байна. Тиймээс бид инфляцын суурь шалтгаануудыг нарийвчлан судалж байгаа. Сүүлийн 10 гаруй жил хуримтлагдсан асуудлууд дээр ч дүн шинжилгээ хийж байна. Цаашид 4-5 жилийн хугацаанд эдгээр асуудлыг шийдэх стратеги төлөвлөгөө боловсруулж, Төв банк илүү цомхон, ухаалаг ажиллах чиглэлд анхаарна” гэдгээ илэрхийлсэн юм.