МАН дотор өрнөж байгаа хамгийн том улс төр бол Нийслэлийн МАН-ыг хэн авах бэ гэдэг тулаан. Намын дарга Н.Учрал болсноос хойш нийслэлийн МАН-ын даргын суудал болоод Хотын даргыг авна хэмээн өнөөдрийг хүртэл талцаж байна. Ямар ч намын удирдлага солигдоход түүнийг дагаад намын дотоод бүтэц, удирдлага өөрчлөгддөг нь бичигдээгүй хууль. Тиймээс ч шинэхэн намын дарга Н.Учрал болоод генсек Я.Содбаатар нар нийслэлийн намын удирдлагаа авах санаархлаа Э.Бат-Амгалангаар эхлүүлсэн.

Нийслэлийн МАН-ын хорооны дарга, Хотын дарга Х.Нямбаатарын ажлыг Барилга хот байгуулалт, орон сууцжуулалтын сайд Э.Бат-Амгалан авахаар дайны талбарт гарчээ. Тэд хэдэн сарын хугацаанд нүүр тулсан тулаан хийлгүй зөвхөн хэвлэл мэдээллийн хэрэгсэл, сошиалаар хэрэлдэж, жагсаал, цуглаанаар үргэлжилж эцэстээ нэгнийхээ хулгай луйврыг илчилж эхэллээ. Э.Бат-Амгалан “Баримтаа гаргаж ирвэл, би бууж өгөхөд бэлэн” гэж хэлсэн бол Хотын дарга Х.Нямбаатарын хэлснээр тэр Баянзүрх дүүргийн “хаан” болж, төсвийн мөнгөөр баянзүрхчүүдийг “угжиж” байгаа баримтуудыг ил гаргасан. Одоо тэдний гаргаж ирсэн баримтуудыг хуулийн байгууллага шалгах л үлдэж байна.

Энэ бүхний эцэст Э.Бат-Амгалан ч мөрөөдлийн суудалдаа сууж чадахгүй, Х.Нямбаатар ч суудалдаа үлдэж чадахгүй хоцрох зураг ч явж буй. Учир нь төсвийн мөнгө завшиж, хувийн компанидаа оруулсан бол хуулийн байгууллагад дуудагдана. Тиймээс энэ удаагийн Нийслэлийн МАН-ын даргын тулаанаас Э.Бат-Амгалан хасагдаж байна. Хотын дарга Х.Нямбаатар ч миний ажлыг авмаар байгаа бол хуулийн дагуу хурлаа зохион байгуулаад ав гэдэг шаардлагыг тавьсан. Тэгэхээр дараагийн Нийслэлийн МАН-ын дарга хэн болох вэ гэсэн асуулт зүй ёсоор өрнөнө.

Гэхдээ энэ бүхэн анхнаасаа өөр дүр зурагтай, өөр зорилготой байсан гэх яриа ч Тусгаар тогтнолын ордонд өрнөх болжээ. Анхнаасаа Э.Бат-Амгаланг Хотын даргад өрсөлдүүлэх бодолгүй, зөвхөн Х.Нямбаатартай өрсөлдүүлэх “хэрэгсэл” байсан гэх яриа ч цагаан байрнаас гарах болсон. Харин жинхэнэ эзэн нь өөр хүн байсан бөгөөд тэр нь УИХ-ын гишүүн Ж.Энхбаяр байсан гэх албан бус мэдээллүүд гарч эхлэв. Ж.Энхбаярын хувьд Г.Занданшатарын Засгийн газарт Эдийн засгийн хөгжлийн сайдаар ажиллаж байгаа. Мөн одоогийн МАН-ын удирдлагуудын хамгийн ойрын хүн гэгддэг. Нийслэлийн МАН бол нам доторх хамгийн хүчтэй, нөлөө бүхий том бүтэц. Нийслэлийн МАН-ын дарга нь Хотыг удирдахаас гадна сонгуульд намаа ялуулж чадвал нам дотроо, улс төрийн хүрээнд ч том кандидат болох боломжтой. Тиймээс одоогийн нөхцөлд Нийслэлийн МАН-ыг удирдаад явах чадамжтай улстөрч, хүн амын тал хувь нь амьдардаг Хотыг удирдаад явах боломжтой кандидат Ж.Энхбаяр байж болох юм хэмээн улс төрийн хүрээнд жиг жуг гэлцэж эхэлжээ.

Ш.ЧИМЭГ