Цахим спортын "CS2" төрлийн "ESL Pro League"-ийн 23 дахь улирлын плей-оффын шат Баасан гаригт Шведийн нийслэл Стокхольм хотод эхэлнэ. Нийт 24 багтай эхэлсэн тэмцээний плей-оффд найм нь үлджээ. Энэ удаагийн тэмцээнд Францын "Vitality" баг оролцоогүй нь бусад багуудын түрүүлэх боломжийг ихэсгэв.

Монголын "The MongolZ" чансаагаараа хоёрдугаар шатнаас тэмцээнээ эхлүүлж, "paiN", "Aurora", "3DMAX" багуудыг хожсоноор плей-оффд шалгарсан.

Тэгвэл тэдний плей-оффын эхний өрсөлдөгч нь Украины "NaVi" баг. Хоёр баг оны эхэнд учраа таарахад Монголын баг 2-1 гэсэн харьцаатай хожиж байлаа.

Сүүлд гарсан албан ёсны мэдээллээр дасгалжуулагч "maaRaa" буюу Б.Эрдэнэдалай багтайгаа хамт Шведийг зориогүй аж. Тэрбээр мөн гуравдугаар сарын 18-ны өдөр эхлэх "BLAST Rotterdam" тэмцээнийг ч өнжих гэнэ. Гэхдээ эдгээр хугацаанд багтайгаа онлайнаар холбогдож, заавар, зөвлөгөөгөө өгөхөөр болжээ.

"ESL Pro League"-ийн 23 дахь улирлын плей-оффын оноолт:

Баасан гаригт

• 17:00 – The MongolZ vs Natus Vincere
• 20:15 – Legacy vs Aurora
• 23:30 – MOUZ vs FUT
• 02:45 – Astralis vs Spirit