"X" буюу олны нэрлэж заншсанаар "Твиттер" платформд олон нийтийн тархийг угаах, төөрөгдүүлэх, үзэл бодолд санаатайгаар нөлөөлөх оролдлого хэрээс хэтэрсэн тул 2024 онд 800 сая хаягийг идэвхгүй болгожээ. Эдгээрийн хэчнээн нь гадаадын оролцоо, нөлөөтэй болохыг тодорхой дурдаагүй. Төрийн дэмжлэгтэйгээр мэдээллийн урсгалыг булаан авах гэсэн оролдлоготой байнга тэмцэж байгаа гэж тус платформын зүгээс мэдэгдсэн байна.

Ийм төрлийн үйл ажиллагааг хамгийн их явуулдаг улсаар Орос тодорсон бол араас нь Иран, Хятад удаалж байна гэжээ.

800 сая хаягийг идэвхгүй болгосон ч платформд манипуляц хийх эсвэл спамаар дүүргэх оролдлого огт буураагүй бөгөөд өнгөрсөн оны сүүлчийн хагаст л гэхэд дахин хэдэн зуун сая хаягийг устгажээ.

"X" платформын зүгээс өгч буй албан ёсны тайлбараар бол манипуляц хийдэг хаяг гэдэг нь бусдад түрэмгий байдлаар саад учруулдаг, төөрөгдүүлдэг хаягууд юм. Харин спам гэдэг нь ихэвчлэн чанар муутай контентыг тасралтгүй нийтлэх хэлбэрээр бусдад нөлөөлөхийг хэлдэг.

Элон Маск 2022 онд платформыг худалдаж авснаас хойш контент зохицуулалтын бодлогоороо олны шүүмжлэлийг хүлээсээр ирсэн. Компанийг худалдаж авах эсэх дээр анх эргэлзэж байсан шалтгаан нь тэдгээр хуурамч хаяг байсан гэдгийг ч Маск ил тод хэлж байжээ.