Үе, үе цахим орчинд хүүхдүүд тэр дундаа өсвөр насныхан онцлоод хэлбэл охидууд нэгнээ бүлэглэн зодож буй бичлэг нийтлэгддэг болов. Ингэх бүрт иргэд халаглаад өнгөрдөг. Цагдаагийн байгууллагаас мэдээлэл гармагц шалгаж байна гэх тайлбарыг хэлдэг. Яг ямар арга хэмжээ авдаг, хэрхэн шийтгэсэн, ямар хуулийн зохицуулалт үйлчилдэг гэх мэт мэдээлэл нь тодорхой бус. Салбарын сайд нь мөн л үүрэг чиглэл өгсөн гэх бөөрөнхий тайлбар хэлдэг. Сүүлийн үед хүүхдийн эрхийг хамгаална, тэднийг ойлго, хайрла гэхээс өөрөөр тэдний үүрэг хариуцлагыг хэлдэг хүн ховор болсон. Нийгэм болохгүй байгаа учраас, үзэж харж байгаа зүйлээсээ, эцэг эх нь хараа хяналт тавихгүй байгаа учраас гэх мэт олон шалтгаанаар хүүхдүүдийг зөвтгөж ирсэн. Ажиглаад байхад, энэ цагт хүүхдүүд цэцэрлэгээсээ эхлээд ялгаварлан гадуурхалтад өртөж байна. Нэг жишээ, нэгэн цэцэрлэгийн ахлах бүлгийн охид нэгнээ дандаа нэг хувцастай ирдэг. Чамд өөр хувцас байдаггүй юм уу” зэргээр гадуурхдаг тухай ээж нь ярьсан. Охидыг, эмэгтэй хүнийг зодож болохгүй гэх үгийг бараг лоозон болгож үүний цаана эрэгтэй хүүхдүүдийн эрх хөсөр хаягдсан. Цахим орчинд явж буй бичлэгийн дийлэнх нь охид байна. Дээрэлхэлт бие махбодын хүчирхийллээс гадна хэл ам, харилцаа хандлага зэргээс эхэлнэ. Зодохоос наана хэл амаар доромжилж улмаар хүүхдийн сэтгэл зүйд нөлөөлж тухайн хүүхэд сургуульдаа явахаа болих цаашлаад амиа хорлох хүртэл хэмжээнд хүрдэг гэдгийг сэтгэл зүйчид хэлж байгаа юм.

Бас нэг асуудал байгаа нь яг энэ зөрчлийн дагуу цагдаа болон сургуулийн захиргаанд хандахаар төдийлөн үр дүнгүй байдаг талаар эцэг, эхийн төлөөлөл хэлж байгаа юм.

Учир нь тодорхой зохицуулалт ховор, ихэнх тохиолдолд буюу ноцтой гэмтэл учруулаагүй бол Зөрчлийн тухай хуулиар зохицуулж, торгууль ногдуулдаг байна. Харин сургуулийн зүгээс тодорхой арга хэмжээ авдаггүй. Тодруулбал, хүүхдэд хүндэвтэр гэмтэл учруулсан нь шүүхээр тогтоогдвол гурван жил хүртэл хорих ялаар шийтгэдэг байна. Ихэнх тохиолдолд Зөрчлийн тухай хуулийн дагуу эцэг, эхэд нь торгууль ногдуулдаг аж. Харин хүнд гэмтэл учруулсан бол 14-өөс дээш насны хүүхдүүдэд Эрүүгийн хуулиар ял ногдуулах боломжтой гэнэ.

Одоо бүгдээрээ хүүхдүүдийнхээ хүмүүжил, ёс зүй, харилцаа хандлага тал дээр анхаарч шат шатны байгууллагууд арга хэмжээ авахгүй бол нэгнээ дээрэлхдэг байдал хэрээс хэтэрч манай хүүхдэд л ийм асуудал ирэхгүй байвал боллоо гэх үзэл газар авч байна.

Хүүхдийн хамгааллын тухай хуулийн 4.1.8."үе тэнгийн дээрэлхэлт" гэж нэг буюу хэд хэдэн хүүхэд өөр нэг буюу хэд хэдэн хүүхдийг бие махбод, сэтгэл санааны хувьд гэмтээх, зовоох, ялгаварлан гадуурхах, айлган сүрдүүлэх, заналхийлэх зорилготой түрэмгий зан үйлээ санаатайгаар, удаа дараа биеэр, амаар болон цахим орчинд үйлдэхийг хэлнэ гэж заасан байна. Хүүхэд хамгааллын тухай хуулийг шинэчлэн найруулж анх удаа үе тэнгийн дээрэлхэлийг хуулиар зохицуулахаар тусгаж өгсөн. Тодруулбал, үе тэнгийн дээрэлхэл үйлдсэн хүүхдэд зөвлөгөө өгөх, уучлалт гуйлгах, сэтгэл зүйн зан үйлийг засах сургалтад эцэг эхийн хамт суулгах шинэлэг заалт бий. Удаа дараа үе тэнгийн дээрэлхэл, дарамт үзүүлсэн хүүхдийг цахим хувийн хэрэгт бүртгэдэг болно гэх заалтыг тусгасан гэж мэдээлж байсан. Тэгвэл уг зохицуулалт нь хүүхдийн дэвшин суралцах эрхэд халдаж буй үйлдэл гэж зарим хүмүүс хэлж байгаа юм. Энэ мэт тодорхой шийдэлгүй, гаргасан шийдвэрээ үгүйсгэж эцэг эхийн буруу нийгмийн буруу гэж нэгнээ чичилж байх зуур бидний ирээдүй болсон хүүхдүүд зэрлэг, балмад хүнийг хайрлах сэтгэлгүй болж өссөөр байна. Тиймээс ямар нэг буруу зүйл хийсэн бол хариуцлага гэж байдаг шүү гэдгийг хүүхдүүддээ хэлж, тодорхой хэмжээнд хариуцлага үүрүүлдэг болох хэрэгтэй байна.