Монгол Улсын Ерөнхий сайд Г.Занданшатар “Рио Тинто" компанийн Зэсийн группийн удирдлагуудтай уулзав.  Энэ үеэр "Оюу толгой" төслийн өгөөжийн дийлэнх Монголын ард түмэнд ногдох ёстой гэв.  Ерөнхий сайд Г.Занданшатар “Эзэн нь юмаа мэдэж, эрэг нь усаа захирдаг гэж өмнө нь хэлж байсан. Алтыг нь аваад авдрыг нь хаяж болохгүй. Хариултууд таалагдахгүй байна. Менежментийн төлбөр буурсан, зээлийн хүү өндөр, нэг тал нь зээлийн хүүгийн зөрүүгээс ашиг хүртээд, нэг тал нь ногдол ашиг хүртэхгүй байгаа нь шударга бус байна. Шударга бус байгаад Монголын парламент, ард түмэн дургүй байна. Монголын ард түмэн, парламент хуурагдсан мэдрэмж өгч байна. Ажлын түвшинд бодитой үр дүн гарахгүй бол Онтрэ  болон бусад асуудлаар ямар шийдвэр гаргахыг бид мэдэхгүй байна” гэсэн яриа өрнүүлжээ.  Өөрөөр хэлбэл, энэхүү уулзалтаар Монголын ард түмэн, парламент гомдолтой байгаа, цаашид ямар  шийдвэр гаргахыг ч тааварлах аргагүй гэсэн утга бүхий сануулгыг өгөв.  Түүний хариуд “Рио Тинто” компанийн Зэсийн группийн захирал Кейти Жаксон Оюу Толгой төслийн өгөөжийг нэмэгдүүлэх, харилцан ашигтай хамтын ажиллагааг бэхжүүлэх чиглэлээр хэлэлцээрийг үргэлжлүүлж, Монгол Улсын Засгийн газартай хамтран ажиллахаа илэрхийллээ.

Оюутолгой төсөл Монгол Улсад, Монголын эдийн засагт “гавьяа”-тай нь үнэн. Гадаадын хөрөнгө оруулагчдыг татаж чадахгүй, аль том хуралд очиж хөрөнгө оруулалт татах зорилго тавьсаар ирсэн Засгийн газрын тэргүүн нь хамгийн том гадаадын хөрөнгө оруулагчаа “загнаад” суух хэр зохимжтой вэ. Мэдээж “Рио Тинто”-той хэлэлцээрийн ширээнд сууж, аль аль тал нь харилцан ашигтай ажиллах нь учиртай. Тиймээс л үе үеийн парламент, Засгийн газар гэрээний нөхцөлийг сайжруулаад, засаад явах боломж нь бий, байсаар ч байх болно. Бид хөрөнгө оруулагчдыг үргээж, айлгахаас илүү хамтран ажиллах, хэлэлцээрийн ширээнд суух нь өнөөдрийн дэлхийд өрнөж буй үйл явц ч харуулж байна.

Үе үеийн Ерөнхий сайд, Засгийн газар, парламент гадаадын хөрөнгө оруулагчдаа үргээхгүй, хөрөнгө оруулагчдыг татна хэмээн амладаг ч бодит хөрсөн дээрээ иймэрхүү байдлаар сануулаад, загнаад түүгээрээ попроод байвал бид хөрөнгө оруулагчдын жинхэнэ утгаараа үргээнэ үү гэхээс татахгүй нь лавтай. Ялангуяа гүйцэтгэх засаглалын тэргүүн нь монголчууддаа таалагдахын тулд хамгийн том хөрөнгө оруулагчаа загнахаас илүү “зөөлөн” хүчний бодлогоор улсдаа, ард түмэндээ ашигтай хувилбарыг сонгож, хамтарч ажиллах нь илүү өгөөжтэй баймаар… Ерөнхий сайдын сануулга бусад хөрөнгө оруулагчдад таагүй сэтгэгдэл төрүүлж, “буулт” нь хүнддэх вий!

Т.ОД