Катар улсын Ерөнхий сайд Мохаммед бин Абдулрахман Аль Тани ярилцлага өгөхдөө, Иран улс Персийн булангийн орнууд руу пуужин болон дрон ашиглан довтолсныг аюултай алдаа гэж шүүмжилжээ. Тэрбээр энэ үйлдэл нь бүс нутгийн тогтвортой байдлыг алдагдуулж, дэлхийн эдийн засагт сөрөг нөлөө үзүүлэх аюултай гэж анхааруулсан байна. Катар улс пуужин болон дроны олон удаагийн довтолгоонд өртсөний дараа тус улсын ерөнхий сайд Абдулрахман Аль Тани анх удаа "Sky News"-д байр сууриа илэрхийлсэн юм. Тэрбээр улс орон нь одоо “маш хүнд үе”-ийг туулж байна гэж хэлжээ. Гэсэн хэдий ч Катарын батлан хамгаалах болон аюулгүй байдлын хүчнийхэн мэргэжлийн өндөр түвшинд ажиллаж байгааг тэрбээр магтсан байна. Мөн Иран улс Персийн булангийн орнуудын харилцаанаас урвасан мэт мэдрэмж төрж байна гэж Абдулрахман Аль Тани хэлжээ. Тэрбээр Катар болон бусад булангийн орнууд эхнээсээ энэ дайнд оролцохгүй гэдгээ тодорхой мэдэгдсэн. Гэвч дайн эхэлснээс ердөө нэг цагийн дараа тэд халдлагад өртсөн байна. Олон жилийн турш Катар улс Ирантай дипломат харилцаагаа хадгалахыг хичээж ирсэн. Иймээс энэ халдлага нь маш их гэнэтийн зүйл болсон байна.

Абдулрахман Аль Тани Катар улс Ирантай сайн харилцаа хадгалахыг үргэлж хичээж ирсэн гэв. Гэхдээ халдлагын талаар Ираны өгсөн шалтгаан, тайлбаруудыг бүрэн хүлээн зөвшөөрөхгүй гэж мэдэгдсэн байна. Ерөнхий сайд цэргийн мөргөлдөөн улам нэмэгдэх нь хямралыг улам дордуулна гэж онцолсон. Тэр бүх талууд, тэр дундаа АНУ улс мөргөлдөөнийг бууруулах ёстой гэж уриалжээ. Түүний үзэж байгаагаар дипломат хэлэлцээ л энэ хямралыг шийдэх цорын ганц зам юм. Мөн Ираны довтолгоо зөвхөн цэргийн байг онилсон гэсэн мэдэгдлийг Абдулрахман Аль Тани үгүйсгэжээ. Зарим халдлага иргэний байгууламжууд руу чиглэсэн байна. Үүнд олон улсын нисэх буудал, усны хангамжийн байгууламжууд болон хийн дэд бүтэц багтаж байна. Түүний хэлснээр нийт халдлагын 25 хувь нь иргэний байгууламжуудыг онилсон бөгөөд энэ нь дайны зорилготой ямар холбоотой вэ гэдэг асуултыг төрүүлж байна.

Катар улс дэлхийн байгалийн хийн ойролцоогоор 20 хувийг нийлүүлдэг төдийгүй хамгийн том бордоо үйлдвэрлэгчдийн нэг юм. Хэдийгээр Персийн булангийн орнууд энэ дайн биднийх биш гэж хэлж байгаа ч бодит байдал дээр тэд энэ мөргөлдөөнд улам татагдан орж байна. Ерөнхий сайдын хэлснээр хамгийн том аюул нь АНУ, Израиль болон Иран хооронд эхэлсэн дайн бүхэл бүтэн Персийн булангийн бүс нутагт тархаж, анхнаасаа оролцохыг хүсээгүй улс орнуудыг хүртэл татан оруулах эрсдэл юм.