Мэргэжлийн холимог тулааны дэлхийн шилдэг холбоо болох "UFC"-ийн "UFC 326" өдөрлөг өчигдөр/2026.03.08/ Лас Вегас хотноо боллоо. Энэхүү өдөрлөгийн оргил тулаан нь Холлоуэй болон Оливейра нарын хооронд болсон ч монголчуудын хувьд Т.Нямжаргал ээлжит тулаанаа хийсэн нь онцлог байв.

Лас Вегас хотын "Т-Mobile" цэнгэлдэхэд нийт 19,480 үзэгч цуглажээ.

Т.Нямжаргалын өрсөлдөгч нь Коди Дарден гэх 34 настай, хашир туршлагатай тамирчин байсан. Хоёр тамирчны тулаан бүтэн гурван үе үргэлжилж, эцэст нь Т.Нямжаргал өрсөлдөгчөө буулган авсан юм.

Тулааны дараа тэрбээр ярихдаа "Хүүхэд насны минь мөрөөдөл биелсэнд баяртай байна. Миний мөрөөдөл холимог тулааны дэлхийн хамгийн том дэвжээ болох UFC-д тулалдах байсан. Би өрсөлдөгчөө урагшаа явж тулалдаж, цохилцох байх гэж бодсон ч барилдах төлөвлөгөөтэй гарч иржээ. Би үүнд нь ч дасч, өөрийнхөө барилдааны чадварыг гаргаж, яллаа. Би бол Чингис хааны үр сад. Жингийнхнээ өмнө сөхрүүлнэ" гэжээ.

Ийнхүү Т.Нямжаргал "UFC" холбоонд албан ёсны гурван тулаан хийснээс хоёрт нь яллаа.

Харин энэ өдрийн оргил тулаанд Чарльз Оливейра илүүрхэж, "BMF" бүсний эзэн боллоо. Түүний хувьд бүтэн таван үеийн турш Макс Холлоуэйг илүүрхэж, барилдаанаар аархав.

"BMF" бүсний шинэхэн эзэн Оливейра ярихдаа "Макс бол миний тулалдаж байсан хамгийн чанга залуу. Би энд илүүрхэх гэж ирсэн. Хэрэв Цагаан ордонд дахиад эсвэл бүсний төлөөх дахиад тулаан байвал та нар намайг хаанаас олохоо мэднэ" гэлээ.