"Замын хөдөлгөөний удирдлагын төв"-ийн хяналтын камерт  өчигдөр /2026.03.06/ 16:00 цагийн байдлаар зам тээврийн найман осол, саад бүртгэгджээ. Эдгээр ослууд нь тухайн чиглэлийн хөдөлгөөний хурдыг удаашруулж, уулзваруудын нэвтрүүлэх чадварыг бууруулан, зохиомол түгжрэл үүсэх нөхцөлийг бүрдүүлдэг байна. Ухаалаг камерын системээр энэ мэт зам тээврийн осол саадыг хугацаа алдалгүй илрүүлж, зохицуулалт хийж ажиллаж байгаа аж.

Иймд замын хөдөлгөөнд оролцож буй жолооч та жолооны ард суусан л бол анхаарлаа 100 хувь төвлөрүүлж, хүний амь нас эд хөрөнгийг нэн тэргүүнд хамгаалан, Монгол Улсын замын хөдөлгөөний дүрмийг чанд мөрдөн, тээврийн хэрэгслийн бүрэн бүтэн байдлыг хангаж, хөдөлгөөнд анхаарал болгоомжтой оролцохыг зөвлөж байна.

Мөн ухаалаг камерын системийг нэвтрүүлснээр гэрлэн дохионы зохицуулалтыг илүү оновчтой болгож, замын хөдөлгөөнийг жигд, тэнцвэртэй зохион байгуулах боломж бүрджээ. Системийн хүрээнд авто замын хөдөлгөөний эрчмийг бодит цагийн горимд тоолж, тээврийн хэрэгслийн урсгал, чиглэлийг нарийвчлан тодорхойлж, зөрчил гаргасан авто машиныг илрүүлэн хяналт тавих нөхцөл бүрдсэн байна.  Замын хөдөлгөөний удирдлагын төвийн мэдээлснээр уг шийдлийн үр дүнд зохицуулалттай бүх уулзвар, гарцын гэрлэн дохионы тохиргоог илүү нарийвчлалтай хийж, гараар удирдах шаардлагыг 50 хувиар бууруулсан байна. Ингэснээр нэг албан хаагчид ногдох ажлын ачаалал багасаж, замын хөдөлгөөн илүү жигд зохицуулжээ.

Өмнө нь 50 уулзварын гэрлэн дохиог өдөрт дунджаар 4500-4800 удаа удирддаг байсан бол одоо 93 уулзварын гэрлэн дохиог мөн ийм давтамжаар удирдаж, илүү өргөн хүрээнд,  үр ашигтай зохион байгуулж ажиллах болжээ.