Засгийн газрын ээлжит хуралдаанаар Хөгжлийн бэрхшээлтэй иргэдийн асуудлыг хариуцсан Засгийн газрын хэрэгжүүлэгч агентлагийн бүтцийг баталжээ. Тодруулбал, Ерөнхий сайд У.Хүрэлсүх тус хэрэгжүүлэгч агентлагийг санаачлан УИХ-д өргөн барьснаар дэмжигджээ. Уг агентлагийг Сэргээн засах сургалт үйлдвэрлэлийн төвийн хүний нөөцөд тулгуурлан байгуулж байгаа тул улсын төсвөөс мөнгө гарахгүй гэдгийг тодотгов.

Хөдөлмөр, нийгмийн хамгааллын сайд С.Чинзориг энэ талаар мэдээлэл өглөө.

Тэрбээр ‘УИХ-аас энэ оны зургадугаар сард Хөгжлийн бэрхшээлтэй хүний хөгжлийн ерөнхий газар байгуулахаар тогтоол баталсан. Шинээр байгуулагдах агентлаг нь шинээр төсөв, орон тоо шаардахгүйгээр байгуулан үйл ажиллагаа явуулах бүрэн боломжтой гэж үзэж байгаа. Хөдөлмөр нийгмийн хамгааллын яамны харьяа хөгжлийн бэрхшээлтэй иргэдийн асуудал хариуцсан Сэргээн засалт, сургалт, үйлдвэрлэлийн төв 121 ажилтан, 2.2 тэрбум төгрөгийн төсөвтэйгөөр үйл ажиллагаа явуулдаг. Энэхүү төвийг түшиглэж 35 хүний орон тоог шинээр байгуулагдах агентлагийн бүтцэд шилжүүлж хүний нөөцийг бий болгоно. Агентлаг байгуулснаар хөгжлийн бэрхшээлтэй иргэдийн өмнө тулгамдсан асуудлыг өөрсдийнх нь оролцоонд тулгуурлан хэрэгжүүлэх боломж бүрдэнэ гэж үзэж байгаа. Мөн нийгмийн амьдралд тэгш оролцох боломж бүхий дэд бүтцийг бий болгоход энэ агентлаг томоохон түлхэц үзүүлэхээс гадна хөгжлийн бэрхшээлтэй иргэдийн хөдөлмөр эрхлэлтийг нэмэх, нийгмийн хамгааллыг сайжруулах, хөгжлийн бэрхшээлийг эрт оношлох боломж бүрдэнэ гэж тооцсон. Монгол Улсын нийт хүн амын 3.5 хувь буюу 103 мянга 600 хөгжлийн бэрхшээлтэй иргэн бий. Үүний 58 хувь нь олдмол бол 42 хувь төрөлхийн хөгжлийн бэрхшээлтэй. Тиймээс Ерөнхий сайдын зүгээс энэхүү агентлагт хөгжлийн бэрхшээлтэй иргэдийн өмнө тулгамдсан асуудлыг ойлгодог, шийдвэрлэх гарц, гаргалгааг сайн мэдэх мэргэжлийн хүмүүсийг ажиллуулахыг ХНХЯ-нд үүрэг болгосон’ гэлээ.

-ХНХЯ хөгжлийн бэрхшээлтэй иргэдийн асуудлыг хариуцдаг. Шинээр тусад нь агентлаг байгуулах зайлшгүй шаардлага байсан уу?

-Хөгжлийн бэрхшээлтэй иргэдийн өмнө боловсрол, эрүүл мэнд, дэд бүтэц зэрэг олон асуудал тулгамддаг. Тиймээс салбар хоорондын уялдааг хангах чиглэлд энэхүү агентлаг ажиллана.

-Хүүхдийн асрамж, халамжийн төвүүдэд байгаа насанд хүрсэн хүмүүсийг байрлуулах тусгай газар байгуулах уу?

-Хөгжлийн бэрхшээлтэй иргэд, хараа хяналтгүй иргэдийн асуудлыг шийдвэрлэхэд Засгийн газар анхаарлаа хандуулан ажиллаж байгаа. Засгийн газрын өнгөрсөн долоо хоногийн хуралдаанаар орон гэргүй иргэдийн талаар авах арга хэмжээний тухай асуудал оруулсан ч Улаанбаатар хотын захиргаатай нэгдсэн ойлголтод хүрэх шаардлагатай байгаа тул түр хойшлуулсан. Удахгүй энэ асуудлыг дахин Засгийн газрын хуралдаанаар хэлэлцүүлнэ. Мөн хөгжлийн бэрхшээлтэй иргэдийн талаар Засгийн газар цогц арга хэмжээ авч хэрэгжүүлэх юм. Тухайлбал, тусгай хэрэгцээтэй иргэдийг асрах халамжийн төвүүдийг шинээр байгуулах шаардлагатай байгаа. Мөн хүүхдийн эрхийг хамгаалах, асрах чиглэлээр үйл ажиллагаа явуулж буй төвүүдэд аттестатчилал явуулна. Улсын хэмжээнд энэ чиглэлээр үйл ажиллагаа явуулдаг 36 байгууллага байгаа ч ердөө дөрөв нь төсвөөс санхүүжилт авдаг. Бусад нь ТББ болон олон улсын байгууллагын шугамаар санхүүжилт авч байна. Монгол Улсын төр эх орны ирээдүй болсон хүүхдүүдээ бусад оронд эсхүл ТББ-д даатгаад байж болохгүй.

Олон улсын валютын сангийн төлөөлөгчидтэй уулзах үеэрээ цалин нэмэгдүүлэх асуудлаар зөвшилцсөн болов уу?

– Олон улсын валютын сангийн төлөөлөгчид өнгөрсөн долоо хоногийн Мягмар гаригт буцсан. Манай яамны зүгээс ирэх долоо хоногийн эхээр гурван талт улсын хэлэлцээрээ эхлүүлэхээр МҮЭХ-той ярилцаж байна. Амжвал ирэх долоо хоногтоо багтаан цалин нэмэгдүүлэх асуудлыг Засгийн газарт оруулна.

-МСҮТ-ийн оюутнуудад 70 мянган төгрөгийн тэтгэлэг олгодог болох асуудал яригдаж байгаа гэсэн. Энэ талаар мэдээлэл өгөөч?

– 2019 оны төсөвт 17 орчим тэрбум төгрөг суулгаж, МСҮТ-ийн оюутнуудад сар бүр 70 мянган төгрөгийн тэтгэлэг олгох асуудал яригдаж байна. Энэ асуудал бараг бидний саналын дагуу шийдэгдэх байх гэсэн хүлээлттэй байгаа.