Иран улс дээд удирдагч Али Хаменеигийн оршуулгах ёслолыг түр хойшлуулсан байна. Албаныхны мэдээлснээр, ёслолд оролцохыг хүссэн хүмүүс маш олон байгаа тул бэлтгэл ажлыг илүү сайн хийх шаардлагатай болсон гэв. Хаменеи өнгөрсөн Бямба гаригт (2026.02.28) АНУ болон Израилийн хийсэн эхний цохилтын үеэр Тегеран хотод амиа алдсан. Түүнтэй хамт эхнэр, нэг хүү болон хэд хэдэн өндөр албан тушаалтан амиа алдсан юм.

Эл өдрөөс хойш АНУ болон Израилийн цохилт үргэлжилж байгаа бөгөөд Иран хариуд нь пуужин болон дрон ашиглан тухайн хоёр орны цэргийн бааз байрладаг Персийн булангийн орнууд руу довтолж байна. Кувейт улсад л гэхэд Ираны довтолгооны үеэр унасан хэлтэрхийнээс болж 11 настай охин амиа алдсан байна. АНУ-ын Батлан хамгаалахын сайд Пит Хегсет АНУ-ын шумбагч онгоц Ираны тэнгисийн цэргийн фрегатыг Шри Ланкын эргийн ойролцоо устгасан гэж мэдэгджээ. Шри Ланкийн эрх баригчдын мэдээлснээр 80 хүний цогцос олдсон бол 32 хүнийг аварсан, харин бусад нь сураггүй хэвээр байна. АНУ болон Израиль ойрын өдрүүдэд Ираны агаарын орон зайг бүрэн хяналтдаа авна гэж мэдэгдсэн. Албаныхны хэлснээр эдгээр цохилтууд нь Ираны цэргийн хүчин чадлыг бүрэн устгах зорилготой юм.

Ираны удирдагчид дайныг хатуу шүүмжилсэн хэвээр байна. Ахлах албан тушаалтан Али Ларижани АНУ-ын ерөнхийлөгч Дональд Трампыг шударга бус дайнд Америкийн ард түмнийг татан оролцуулсан гэж буруутгасан байна. Үүний зэрэгцээ Иран шинэ дээд удирдагчаа сонгохоор бэлтгэж байна. Энэ шийдвэрийг Шинжээчдийн ассамблей хэмээх 88 гишүүнтэй шашны байгууллага гаргана. Болзошгүй залгамжлагчдын нэг нь Хаменеигийн хүү Можтаба Хаменеи гэж үзэж байна.

Израиль мөн Иран даяар довтолгоогоо үргэлжлүүлж байна. Тус улсын Батлан хамгаалах хүчний мэдээлснээр 100 гаруй сөнөөгч онгоц Тегеран дахь цэргийн байгууламж, пуужингийн систем болон командын төвүүдэд цохилт өгсөн байна. Мөн Израилийн "Lockheed Martin F-35 Lightning II" сөнөөгч онгоц Ираны "Yakovlev Yak-130" онгоцыг буудаж унагасан гэж мэдэгджээ. Энэхүү дайн их хэмжээний хохирол учруулж байна. Ираны төрийн мэдээллийн хэрэгслүүдийн мэдээлснээр мөргөлдөөн эхэлснээс хойш 1000 гаруй хүн амиа алдсан. Харин хүний эрхийн байгууллагуудын мэдээлснээр 1097 энгийн иргэн, түүний дотор 10-аас доош насны 181 хүүхэд нас барсан байж магадгүй гэжээ.

Иран улс Израиль болон хөрш орнууд руу олон зуун пуужин, дрон харвасан. Довтолгоо болон пуужингийн хамгаалалтын ажиллагаа Саудын Араб, Турк, мөн Катар зэрэг орнуудад мөн бүртгэгдсэн. Сүүлийн тав хоногийн хугацаанд пуужингийн довтолгооны улмаас Израильд 10 хүн амиа алдсан байна. Мөргөлдөөн үргэлжилсээр байгаа бөгөөд бүс нутагт өргөн хүрээний дайн гарах эрсдэл нэмэгдэж байна.