Нийслэлийн Улаанбаатар хөгжлийн корпорацын захирал Ж.Сандагсүрэнг Ерөнхий сайд Г.Занданшатар өөрийн Ахлах зөвлөх бөгөөд Ажлын албаны даргаар томилсон. Харин түүний оронд нийслэлийн СХД-ийн ИТХ-ын тэргүүлэгчээр ажиллаж байсан Л.Тэмүүжинг томилсон гэдгийг хотын дарга Х.Нямбаатар хэлсэн юм. Нийслэлийн Сонгинохайрхан дүүргийн Засаг дарга асан Ж.Сандагсүрэн нь 2012-2020 онд СХД-ийн ИТХ-ын төлөөлөгч, 2016-2020 онд СХД-ийн Засаг дарга, 2020-2023 онд Нийслэлийн Засаг даргын орлогч, 2020 оноос одоог хүртэл НИТХ-ын төлөөлөгчөөр ажилласан юм. Түүний хийж байсан ажлыг үргэлжлүүлэхээр СХД-ийн ИТХ-ын тэргүүлэгчийг сонгосон байна.

Монгол Улсын Их хурлын 2013 оны 23 дугаар тогтоолоор "Улаанбаатар хотыг 2020 оны хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагын баримт бичиг" батлагдсанаар Нийслэлийн иргэдийн Төлөөлөгчдийн хурлын 2015 оны дөрөвдүгээр сарын 30-ны өдрийн 26/09 дугаар тогтоолоор "Улаанбаатар хотын хөгжлийн корпораци" ХК нь Монгол Улсын урт хугацааны хөгжлийн "Алсын хараа 2050", "Нийслэлийг 2021-2025 онд хөгжуулэх үндсэн чиглэл", "Нийслэлийн Засаг даргын 2020-2024 оны үйл ажиллагааны хөтөлбөр", түүнийг хэрэгжүүлэх төлөвлөгөө, "Нийслэлийн 2023 оны жилийн төлөвлөгөө" зэрэг нийслэлийн хөгжлийн дунд болон урт хугацааны бодлогын баримт бичгүүдэд тусгагдсан төсөл, хөтөлбөрүүдийг нийслэлийн төсөвт дарамт учруулахгүйгээр, байгаль орчинд ээлтэй ногоон хөгжлийг дэмжсэн, хувийн хэвшлийн шилдэг менежмент, гадны хөрөнгө оруулагчдын итгэл дээр тулгуурласан, төр хувийн хэвшлийн хамтын ажиллагааг хөгжүүлэх зорилгоор үүсгэн байгуулагдсан байдаг.