Төрийн болон орон нутгийн төсвийн хөрөнгөөр хэрэгжих аливаа ажил, үйлчилгээ, бараа нийлүүлэлтийн гүйцэтгэгчийг сонгон шалгаруулахдаа хууль, журмын дагуу нээлттэй тендер зарлаж, өрсөлдөөний үндсэн дээр шалгаруулдаг. Энэ нь төсвийн хөрөнгийг ил тод, үр ашигтай зарцуулах, олон нийтийн хяналтыг хангах, чанартай гүйцэтгэгчийг сонгох үндсэн механизм болдог. Жил бүр төсвийн ерөнхийлөн захирагчид өөрсдийн багцын хүрээнд хэрэгжүүлэх төсөл, арга хэмжээнийхээ дагуу худалдан авах ажиллагааны төлөвлөгөөг баталж, тухайн онд зарлах тендерийн тоо, чиглэлийг тодорхойлдог. 2026 онд дараах таван төсвийн ерөнхийлөн захирагч хамгийн олон тендер төлөвлөсөн байна.

Тодруулбал, 2026 онд хамгийн олон тендер төлөвлөсөн төсвийн ерөнхийлөн захирагчдаас Боловсролын сайд нэгдүгээрт бичигдэж байна. Түүний багцад нийт 2995 тендер төлөвлөгдсөн нь бусдаасаа хамгийн өндөр үзүүлэлт болжээ.

Харин хоёрдугаарт Эрчим хүчний сайд 2648 тендер төлөвлөсөн бол гуравдугаарт, Нийслэлийн Засаг дарга 1706 тендертэйгээр бичигдсэн байна. Харин Хөвсгөл аймгийн Засаг дарга 1335, Өмнөговь аймгийн Засаг дарга 1286 тендер төлөвлөснөөр жагсаалтыг удаалжээ.

2026 онд Хамгийн олон тендер төлөвлөсөн 5 төсвийн ерөнхийлөн захирагч: 

Төсвийн тухай хуулийн 8.3.3 дахь заалт, Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуулийг тус тус үндэслэн Монгол Улсын Засгийн газраас төсвийн ерөнхийлөн захирагч нарын 2026 оны төсвийн орлогын доод хязгаар, төсвийн зарлагын дээд хязгаарыг баталсан.

Тухайлбал Эрчим хүчний сайд Б.Чойжилсүрэнгийн 2026 оны төсвийн хязгаарын урсгал зардлыг 85.3 тэрбум төгрөг, хөрөнгө оруулалтыг 374.8 тэрбум төгрөг нийт 460.1 тэрбум төгрөгөөр баталсан байна.

САЙД НАРЫН 2026 ОНЫ ТӨСВИЙН ХЯЗГААР

• Монгол Улсын Ерөнхий сайд: 360,4 тэрбум төгрөг
• Засгийн газрын Хэрэг эрхлэх газрын дарга: 82,4 тэрбум төгрөг
• Тэргүүн Шадар сайд бөгөөд Эдийн засаг, хөгжлийн сайд: 207,5 тэрбум төгрөг
• Шадар сайд: 277,6 тэрбум төгрөг
• Гадаад харилцааны сайд: 223,8 тэрбум төгрөг
• Сангийн сайд: 4,5 их наяд төгрөг
• Эрчим хүчний сайд: 460.1 тэрбум төгрөг.
• Зам тээврийн сайд: 1 их наяд төгрөг
• Хүнс, хөдөө аж ахуй, хөнгөн үйлдвэрийн сайд: 671,2 тэрбум төгрөг
• Батлан хамгаалахын сайд: 661,8 тэрбум төгрөг
• Эрүүл мэндийн сайд: 1.5 их наяд төгрөг
• Аж үйлдвэр, эрдэс баялгийн сайд: 288,5 тэрбум төгрөг
• Цахим хөгжил, инновац, харилцаа холбооны сайд: 64.8 тэрбум төгрөг
  
• Хууль зүй, дотоод хэргийн сайд: 1,3 их наяд төгрөг
• Соёл, спорт, аялал жуулчлал, залуучуудын сайд: 553 тэрбум төгрөг
• Гэр бүл хөдөлмөр нийгмийн хамгааллын сайд: 4.4 их наяд төгрөг
• Хот байгуулалт, барилга орон сууцжуулалтын сайд: 416 тэрбум төгрөг
• Шадар сайд: 5,3 тэрбум төгрөг
• Боловсролын сайд: 3,6 их наяд төгрөг
• Байгаль орчин, уур амьсгалын өөрчлөлтийн сайд: 199,2 тэрбум төгрөг

Эх сурвалж: legalinfo.mn