Автомашины улсын дугаарын хязгаарлалт үйлчлэхгүй

Улс даяар нөхөж ажиллаж байгаа энэ өдөр /2026.02.28/ автомашины улсын дугаарын хязгаарлалт үйлчлэхгүй гэдгийг Замын хөдөлгөөн удирдлагын төвөөс мэдээлжээ.

Өнөөдөр улс даяараа нөхөж ажиллаж байна. Учир нь, сар шинийн битүүний өдөр хоёрдугаар сарын 17-нд буюу Мягмар гаригт тохиосон тул Засгийн газраас зохицуулалт хийж, тухайн өдөр бүх нийтээр амрах, харин хоёрдугаар сарын 28-нд бүх нийтээр нөхөж ажиллахаар болж шийдвэрлэсэн юм. Иймээс өнөөдөр /2026.02.28/ ажлын өдөр тул төрийн бүх байгууллага ажиллаж, цэцэрлэг, сургууль ч хичээллэнэ.

Нийслэлийн Засаг даргын захирамжаар 2020 оноос тээврийн хэрэгслийн улсын дугаарын сүүлийн оронгоор хязгаарлаж замын хөдөлгөөнд оролцуулах зохицуулалт мөрдөгдөж байгаа юм. Тодруулбал,

Тээврийн хэрэгсэлд одоогийн мөрдөгдөж байгаа хязгаарлалт:

1, 6-аар төгссөн дугаартай тээврийн хэрэгсэл – Даваа гариг
2, 7-оор төгссөн дугаартай тээврийн хэрэгсэл – Мягмар гариг
3, 8-аар төгссөн дугаартай тээврийн хэрэгсэл – Лхагва гариг
4, 9-өөр төгссөн дугаартай тээврийн хэрэгсэл – Пүрэв гариг
5, 0-ээр төгссөн дугаартай тээврийн хэрэгсэл – Баасан гаригт 08:00-20:00 цагийн хооронд авто замын хөдөлгөөнд оролцохгүй.