Нийслэлийн МАН-ын хорооны хурал ирэх сард болох товтой. Хурлаар намын хорооны даргаа сонгох бөгөөд энэ сунгаанд өрсөлдөж буй улстөрчдийн зөрчил ил цагаан өрнөж байна. Тодруулбал, одоогийн нийслэлийн Засаг дарга Х.Нямбаатар 2024 оны сонгуулийн дэвшүүлсэн мөрийн хөтөлбөр, сонгогчдод өгсөн амлалтаа  биелүүлэхээр намын хорооны даргын суудлаа хамгаалах бол нөгөө талаас Барилга, хот байгуулалт, орон сууцжуулалтын сайд Э.Бат-Амгалан өрсөлдөнө гэдгээ мэдэгдсэн. Тэрбээр өчигдөр /2026.02.27/ МАН-ын Бага хурлын II хуралдааны үеэр өөрийн байр сууриа илэрхийлэхдээ "Нийслэлийн МАН-ын хорооны хурал болох сураг бий. Гадуур намайг нийслэлийн МАН-ын даргын суудлыг авна гэж яриад байна лээ. Би хотын дарга болохгүй гэж хэлсэн. Харин Нийслэлийн МАН-ын даргын санал ирвэл, би болно. Надад тэр ажлыг хийх туршлага бий" гэсэн юм.

Мөн тэр өөрийг нь шүүмжилсэн нийтлэлч Баабарт хандан "Жинхэнэ монгол хүн ач зээгээ хараад, ард иргэдийнхээ сайн сайхны төлөө юм яриад сууж байх ёстой байтал амьд тролл болж, ийм балай юм яриад сууж байна" гэсэн юм. Харин нийтлэлч Б.Батбаяр буюу Баабар "Би ач зээгээ хараад гэртээ л байгаа шүү дээ. Зөнөхийн хувьд сэтгэцийн талаар төрийн бөөс хуурс болсон энэ луйварчингаас мянга дахин эрүүл саруул" гэдэг хариултыг өгсөн. Энэ мэтчилэн нийслэлийн МАН-ын даргын сунгаатай холбоотой талцал, хэрүүл олон нийтийн сүлжээнд өрнөж байна.

Тэр дунд хотын дарга асан Э.Бат-Үүл одоогийн нийслэлийн Засаг дарга Х.Нямбаатарыг дэмжиж байгаагаа өөрийн сошиал хуудсаараа дамжуулан илэрхийлжээ. Тэрбээр "Хотын дарга хэл амандаа эрэмгий. Хэрэг нь ч гардаг. Засгаас авсан шийдвэрлэгдээгүй хэдэн ажлыг шийдэх хэрэгтэй. Нэгд, замын цагдааг хотын мэдэлд авч, түгжрэлийг шийдэх. Хоёрт, Улаанбаатарын дулаан хангамж болон эрчим хүчийг мэдэлдээ авах. Гуравт, Богд уулын ойн бүсээс бусад барилгажсан болон барилгажих газрыг хотын мэдэлд авах. Эдгээр ажлыг хийчих. Тэгвэл бүр мундаг шүү" гэж зөвлөсөн байх юм.