Төрийн цагдаа түмнийг хамгаална. Миний цагдаа намайг хамгаална гэж ярьдаг. Цагдаагийн алба бол төрийн нэрийн өмнөөс хууль сахиулах, иргэдийн аюулгүй байдлыг хангах онцгой хариуцлагатай байгууллага. Тиймээс тэдний мөрдөс, дүрэмт хувцасыг нь эрх мэдлийн бус, үүрэг хариуцлагын бэлгэдэл мэтээр ойлгох ёстой. Саяхан цахим орчинд нэгэн бичлэг ил болж, олон нийтийн бухимдлыг төрүүлэв. Сонгинохайрхан дүүргийн цагдаагийн алба хаагч нэгэн иргэнийг “Чи гэмт хэрэг үйлдсэн” хэмээн тулган шаардаж, биед нь ноцтой халдсан үйлдэл олон нийтэд дэлгэгдэв. Энэ эрүүдэн шүүх, дарамт шахалт үзүүлэх, хүний халдашгүй эрхэд халдсан ноцтой зөрчил мөн. Монгол Улсын Үндсэн хууль болон Эрүүгийн хуульд хэнийг ч эрүүдэн шүүх, хүнлэг бус, хэрцгий харьцахыг хатуу хориглодог.

Хүний эрх, эрх чөлөөг хамгаалах нь хууль сахиулагчдын нэн тэргүүний үүрэг.

Түүнийг зөрчих нь нийгмийн итгэлийг эвдэж буй хэрэг.  Гэмт хэрэгтэй тэмцэх нь хэцүү, эрсдэлтэй ажил. Гэвч зорилго нь зөв бол арга нь хамаагүй гэх хандлага хууль сахиулах байгууллагад байж болохгүй. Хууль дээдлэх зарчим бол аливаа ажиллагааны суурь байх ёстой.

Нэг алба хаагчийн буруу үйлдэл бүх байгууллагын нэр хүндэд нөлөөлдөг. Өдөр шөнөгүй жижүүрлэж, эрсдэлтэй нөхцөлд үүрэг гүйцэтгэн, олон хүний амь нас, аюулгүй байдлыг хамгаалж буй мянга мянган цагдаагийн хөдөлмөрийг ганц бичлэг үгүйсгэх эрсдэлтэй.

Нийгэм нээлттэй, ил тод. Камер, гар утас, цахим орчин хяналтын нэг хэлбэр болсон. Ийм нөхцөлд хууль сахиулагчдын мэргэжлийн ур чадвар, харилцааны соёл, хүний эрхийн мэдрэмж улам чухал болж байна. Хүчээр асуудал шийдэх үе өнгөрсөн. Хууль ёсны, баримтад суурилсан, хүний эрхийг дээдэлсэн ажиллагаа л үр дүн авчирна. Нийгмийн амгалан тайван байдлыг сахиулагчид өөрсдөө тэр амгалан байдлын жишиг байх учиртай. Төрийн цагдаа амгалан байг гэх үг зүгээр нэг үг биш. Энэ нь хууль сахиулагч бүрт хандсан шаардлага юм.

Амгалан бай.

Хуулиа дээдэл.

Хүний эрхийг хүндэл.

Итгэл даа.