Нийслэлийн МАН-ын хорооны гишүүд үндсэндээ ийм хоёр сонголтын өмнө ирээд байна. Энэ сонголтыг угтан битүүхэн өрнөж байсан нийслэлийн МАН-ын хорооны даргын сунгаа ил цагаан сөрсөлдөөн болж хувирав. Хотын намын хорооны гишүүд ирэх сард болох товтой байгаа хурлын үеэр дээрх хоёрын аль нэгийг сонгоно. Өөрөөр хэлбэл, урьдын жишиг шиг төв намаас нь нэг хүний нэр дэвшүүлээд, зааланд хуран цугласан гишүүд нэрхийтэл алга хавсруулан дэмждэг явдал энэ удаад давтагдахгүй гэсэн үг.

Өрсөлдөгчдийг харвал, нэг талаас Нийслэлийн Засаг дарга бөгөөд Улаанбаатар хотын захирагч Х.Нямбаатар 2024 оны сонгуулийн дэвшүүлсэн мөрийн хөтөлбөр, сонгогчдод өгсөн амлалтаа  биелүүлэхээр намын хорооны даргын суудлаа хамгаална. Нөгөө талаас УИХ, Засгийн газрын гишүүн давхар дээлтэй, Барилга, хот байгуулалт, орон сууцжуулалтын сайд Э.Бат-Амгалан өрсөлдөнө.

Хотын намын хорооны гишүүдийн хувьд Баянзүрх, Сонгинохайрхан гэсэн хүн ам, гишүүдийн тоо, нийслэлийн ИТХ-д олонхыг бүрдүүлдэг хоёр том фракцын сөргөлдөөнөөр сонголтоо хийнэ. Энэ нь улс төр сонирхогчдод үзүүштэй өрсөлдөөн боловч намын хэрүүл сонирхдоггүй хотын иргэн талаас харвал өдөр тутмын амьдралд томоохон нөлөө үзүүлэх сонгууль гэж болохоор байна.

Учир нь нийслэлийн намын хорооны дарга, хотын даргын албан тушаалд автоматаар очдог жишиг бий. Хэрэв намын хорооноос сонгогдож чадахгүй бол хотын даргын суудалд ч дэмжлэг авдаггүй жишигтэй. Энэ шалтгаан болон Ерөнхийлөгчийн 2027 оны сонгуулиар нийслэлд нөлөөлж чадах лидер, сонгуулийн туршлагатай менежерийг МАН-ын төв аппаратаас дэмжих нь гарцаагүй. Хотын намын хорооны гишүүд ч үүнийг хүсэж байгаа. Зураг дээрх хоёр өрсөлдөгч эдгээр шаардлагыг хангах шаардлагатай.

Энэ шаардлагуудыг хангасан гэж үзвэл, өнөөгийн нөхцөлд хот захирч, намын хорооны даргаар ажиллаж буй Х.Нямбаатартай эн зэрэгцэх өрсөлдөгч үгүй гээд хэлчихэд буруудахгүй. Хотын 2024 оны сонгуулийн үр дүн, хот, нийтийн аж ахуйг сайжруулахаар хийж хэрэгжүүлж буй ажлуудыг нь дурдахад тэр хангалттай тэнцэнэ. Хотын хамгийн том дүүрэг Сонгинохайрхан дүүргийн албан хаагч, дүүргийн төлөөлөгч, ИТХ-ын дарга, УИХ-ын гишүүн, Хууль зүйн сайд зэрэг намтар нь баргийн улс төрийн замналд байхгүй нь үнэн. Энд “төлгөн коммунист” нэр зүүтлээ намдаа зүтгэснийг нь нуршаад хэрэггүй биз. Ямар сайндаа л энхрий хайрт намынхаа даалгавраар УИХ-ын гишүүн, Хууль зүйн сайдын албан тушаалаас татгалзаж, Улаанбаатар хотын захирагчаар ирсэн байдаг. Энэхүү улс төрийн замналдаа ямар нэг авлига, албан тушаалын хэрэгт холбогдож, хуулийн байгууллагын хаалга татаагүй нэгэн. Үе үеийн хотын дарга нарын нэр холбогддог газрын наймаа, барилгын бизнест нэр холбогдоогүй.

Түүний өрсөлдөгчөөр тодроод буй Барилга, хот байгуулалт, орон сууцжуулалтын сайд Э.Бат-Амгалангийн хувьд мөн л шаггүй улс төрийн намтартай.

Тэрбээр хар залуугаараа Баянзүрх дүүргийн төлөөлөгчөөр ажиллаж сонгуульт ажлын гараагаа эхэлсэн. Х.Нямбаатарыг УИХ-ын гишүүн, Хууль зүйн сайдаар ажиллаж байх хугацаанд буюу 2016-2020 онд нийслэлийн ИТХ-ын төлөөлөгчөөр ажиллаж байгаад, Баянзүрх дүүрэгт хэдхэн сарын хугацаатай Засаг дарга болж зэрэг нэмэх шахсан. Улмаар Баянзүрх дүүргээсээ УИХ-ын гишүүнээр сонгогдож, өдгөө Барилга, хот байгуулалт, орон сууцжуулалтын сайдаар ажиллаж байна. Улс төрийн замналын хувьд чимээгүй боловч богино хугацаанд дардан замаар асар өндөрт өгссөн улстөрч. Дүүргийн болон хотын намд гал авах лидер явсан намтаргүй, дуулиан шуугиан багатай улстөрчдийн адилаар элдэв нэр хоч зүүж амжаагүй яваа. Гэхдээ барилгын салбарын сайдаар томилогдоход барилгын бизнестэй гэдгээрээ ашиг сонирхолтой сайд нарын нэгээр тодорсон. Тэр нь ч үнэн бөгөөд орон сууцны томоохон хорооллуудаас эхлээд үзвэр үйлчилгээний барилгуудаа дандаа Баянзүрх дүүрэгт байгуулсан нь тохиолдлын хэрэг биш.

Барилгын салбар дахь энэхүү оргил амжилт нь улс төрийн богино бөгөөд амжилттай замналтай нь цаг хугацааны хувьд давхацдаг. Иймд “Баянцээлийн баарны эзнээс барилгын салбарын магнат, сайд болсон” гэх тодорхойлолт зүүгээд буй. Саяхан Э.Бат-Амгалангийн төрсөн дүү тэргүүтэй хамаарал бүхий Эрдэнэтийн үүсмэл ордыг ашигладаг 24500 хувьцаа эзэмшигчтэй “Зэс эрдэнийн хувь” компаниас 30 тэрбум төгрөг шамшигдуулан, барилгын бизнестээ оруулан мөнгө угааж, найруулсан талаар дуулиан дэгдсэн. Тиймээс “Зэс эрдэнийн хувь” компанийн 24500 хувьцаа эзэмшигчийн төлөөлөл түүнийг болон түүний тойрон хүрээлэгчдийг шалгаруулахаар АТГ-д зарга үүсгээд байгаа.