"BLACKPINK" хамтлагийн Женни эмзэг бүлгийн ахмад настнуудад гэр орноо халаахад нь туслах зорилгоор 100 сая вон буюу 75 мянган ам.доллар хандивлажээ.

Сайн дурын идэвхтэн, дуучин Шон хоёрдугаар сарын 24-нд цахим сүлжээндээ "BLACKPINK хамтлагийн Женни миний санаачилсан ‘Солонгосын температурыг 1 градусаар нэмэгдүүлэх’ кампанит ажлын хүрээнд Шахмал түлшний банканд 100 сая вон хандивлаж, түлш хэрэгтэй ахмад настнуудад орон гэрээ дулаацуулах боломж бүрдүүлэхийг хүслээ" гэж мэдэгдсэн байна.

Тэрбээр мөн Женнигийн өгсөн хандив нь ойролцоогоор 112 мянган шахмал түлш худалдан авах боломжтой бөгөөд 560 өрхийг нэг сарын турш дулаан байлгахад хангалттай гэдгийг онцлон тэмдэглэсэн байна.

Энэхүү хандив нь дуучин Женнигийн нэгдүгээр сард болсон "J2NNI5" гэрэл зургийн үзэсгэлэнгийн ашиг болон хувийн мөнгөнөөс нь бүрдсэн байна. Нүүрсний шахмал түлш бол Өмнөд Солонгост зарим бага орлоготой айл өрхүүдийн хувьд өвлийн улиралд гэрээ дулаан байлгах чухал зүйл хэвээр байна. Тиймээс олон алдартнууд өвлийн улиралд тусламж болгон шахмал түлш хандивлах нь түгээмэл байдаг. Фенүүд нь Женнигийн чимээгүй өгөөмөр сэтгэлийг магтаж байсан ч дуучин өөрөө хандив өгсөн талаараа олон нийтэд ямар ч тайлбар хийгээгүй аж.

Үүний оронд тэрбээр хоёрдугаар сарын 24-нд хувийн цахим хуудсандаа"BLACKPINK"-ийн гурав дахь мини цомог болох "DEADLINE"-ийн зургийг нийтэлжээ.

Зураг дээр хамтлагийн гишүүд болох Женни, Жисү, Розе, Лиза нарыг харуулсан. Энэ  нь тэднийг эргэн тайзнаа гарахыг харах гэсэн хүлээлт фенүүдийн дунд нэмэгдэхэд нөлөөлжээ. "YG Entertainment" тус цомгийг "эргэлт буцалтгүй оргил мөчүүд" болон "BLACKPINK хамгийн гэрэл гэгээтэй мөчүүдээр" дүүрэн байх болно гэж мэдэгджээ. “DEADLINE” цомог хоёрдугаар сарын 27-ны өдрийн 14:00 цагт нээлтээ хийхээр товлогдсон байна.