Ким Жон Ун саяхан болсон Хөдөлмөрийн намын IX их хурлаар дахин намын даргаар сонгогдсон билээ. Харин удирдагчийн дүү Ким Ё Жон Улс төрийн товчооны орлогч гишүүнээр дахин томилогдож, шинээр байгуулагдсан Төв хорооны 17 хэлтсийн даргын нэг болсноор байр сууриа бэхжүүлэв. Ким Ё Жон 2021 онд болсон намын VIII их хурлаар Улс төрийн товчооны орлогч гишүүний албан тушаалаасаа чөлөөлөгдөөд байсан юм.

Ким Ё Жон чухам аль хэлтсийг удирдахыг "KCNA" тодорхой мэдээлээгүй. Гэхдээ улс орны дотоод хэрэг болон АНУ-тай холбоотой асуудлыг хариуцдаг байснаас нь үзвэл гадаад стратегид илүү анхаарч ажиллаж магадгүй.

Кюннам их сургуулийн Алс дорнод судлалын хүрээлэнгийн профессор Лим Юл Чул "Төв хорооны хэлтсийн дарга болсон гэхээр Ким Ё Жон гадаад хэрэгт голлох үүрэг гүйцэтгэх болов уу. Хойд Солонгос улс өмнөд хөршөө дайсагнасан улс гэж тодорхойлж, илүү түрэмгий байр сууринд шилжсэн. Тэгэхээр Ким Ё Жон энэ стратегийг хянах үүрэг бүхий шинээр байгуулагдсан хэлтсийг удирдах байх" гэжээ.

Харин Солонгосын үндэсний нэгдлийн хүрээлэнгийн ахлах судлаач Хон Мин "Ким Ё Жоны үйл ажиллагааны цар хүрээ Улс төрийн товчооны бусад удирдагчийнхаас аль хэдийнэ давсан байсан. Гэхдээ нас залуу гэдэг шалтгаанаар түүнд өндөр албан тушаал олгоогүй байсан. Өдгөө 38 нас хүрсэн хойно нь албан ёсоор албан тушаалд томилж буй нь Ким Жон Уны засаглалыг бэхжүүлж, залгамж халааны тогтолцоог тогтворжуулах зорилготой байх" гэсэн юм.

Өмнөдийн Нэгдлийн яамны албан тушаалтны хэлснээр Ким Ё Жон хэлтсийн даргын албан тушаалд томилогдож, Жо Ён Вон намын нарийн бичгийн дарга, хэлтсийн даргын албан тушаалаас буусан нь Хөдөлмөрийн намын бүтцэд өөрчлөлт орсон байж болзошгүйг илтгэх аж. Жо Ён Вон нь Ким Жон Уны дотны итгэмжлэгдсэн хүн. Түүнийг намын нарийн бичгийн даргын албан тушаалаас буулгасан ч Улс төрийн товчооны тэргүүлэгчдийн нэг хэвээр үлджээ. Хойд Солонгосын Ардын дээд хурлын Байнгын хорооны даргаар түүнийг томилж магадгүй юм.