Холливудын жүжигчин, өдгөө 68 настай Ричард Гирийн гэргийн 35 настай жүжигчин Алехандра Сильва бие давхар болсон талаар Испанийн ABC портал мэдээлжээ. Хосууд өнгөрсөн дөрөвдүгээр сард албан ёсоор гэрлэсэн бөгөөд тавдугаар сарын 6-нд Нью-Йоркт хуримын ёслолоо хийсэн зураг нь Испанийн “Hola!”  сэтгүүлд нийтлэгдэж байсан юм. Ричард Гирийн хувьд өмнөх гэрлэлтээсээ нэг хүүтэй. Жүжигчин Кэри Лоуэлл, Ричард Гир нар долоон жил болзсоныхоо дараа 2012 онд гэрлэсэн ч энэ нь удахгүй салалтаар төгссөн билээ. Гэр бүл цуцлах шүүхийн процесс  бараг дөрвөн жил үргэлжилсний эцэст 2016 онд жүжигчин эр албан ёсоор гоонь эрийн тоонд багтсан. Энэхүү гэрлэлт  бүтэлгүйтсэн нь хосууд үзэл бодлын хувьд зөрүүтэй байсантай нь холбоотой гэж америкийн хэвлэлүүд бичдэг. Тодруулбал, Ричард Гир нам гүм тайван амьдрах хүсэлтэй байсан нь Кэри Лоуэллын хувьд хүлээн зөвшөөрөхөд хэцүү байсан гэдэг.

Ричард, Алехандра Сильва нар 2014 онд Италид уулзаж дотноссон. Тэр үед Гир гэрлэлтээ цуцлуулах өргөдлөө өгчихөөд Европоор амарч байсан аж. Алехандра бүр эртнээс л Гирийг мэддэг байж. Учир нь Ричард Гир ирээдүйн найз бүсгүйнхээ аав, хөлбөмбөгийн “Реал Мадрид” клубын дэд ерөнхийлөгч байсан Игнасио Сильватай  эртний танилууд байжээ.

“Бидний хайр бэрхшээлтэй учирсан” гэж Алехандра Испанийн хэвлэлд ярилцлага өгөхдөө дурссан байдаг. Учир нь тэд учрах үед Гир хэдийгээр салахаар өргөдлөө өгсөн ч эцэслэж шийдэгдээгүй байлаа. Бас Алехандра ч өөрөө эрх чөлөөтэй болж чадаагүй,  Америкийн баян бизнесмен, Гованд Фридландаас гэрлэлтээ цуцлуулах процесс нь үргэлжилж байжээ. Түүний нөхөр Гованд Фридланд бол 1,8 тэрбум долларын хөрөнгөтэй уул уурхайн Ivanhoe Mines концернийн өв залгамжлагч байсан бөгөөд тэд 2012 онд хүүтэй болцгоосон ч, гэрлэснээсээ хойш найман жил болоод салжээ.

Эх сурвалж: Зууны мэдээ