News.mn сайт АПУ ХК-ийн дэмжлэгтэйгээр Итали улсаас мэдээлж байна.

НЭМЭЛТ:

Түүний эцэг, эх өнөөдөр хүүгээ үзэгчдийн суудлаас үзэж байлаа.

Уулын цанын төрөлд Швейцарийн 29 настай Лоик Мейяр түрүүлж, Австрийн 28 настай Фабио Гштрайн мөнгөн медаль, Норвегийн 31 настай Хенрик Кристофферсен хүрэл медаль тус тус хүртжээ.

---

Монгол Улс түүхэндээ анх удаагаа уулын цанын спортоор өвлийн олимпод өрсөлдөж байна. Өнөөдөр/2026.02.16/ А.Ариунбат эрэгтэйчүүдийн слалом төрөлд гараанд гарлаа.

Тэмцээн болж буй Бормио хотод цас их орсон учир зам амаргүй байв. 96 тамирчин гараанаас гарч, ердөө 44 нь бариандаа оров. Медалийн таамагт байсан тамирчид ч эхний гараандаа бүдэрч, харамсалтайгаар уралдаанаа өндөрлүүллээ.

А.Ариунбатын хувьд 88 дугаартай гараанаас гарч, 43 дугаар байраар барианд оров. Түүний ард Энэтхэгийн тамирчин Ариф Мохд Хан оржээ.

Эхний гараагаа амжилттай дуусгасан А.Ариунбат ярихдаа:

-Ер нь 96 тамирчнаас 44 нь барианд орлоо. Одоо хоёрдугаар гараанд өрсөлдөнө. Олимпын зам мөстэй байна. Хүмүүс цэвэрлээд байгаа болохоор катокийн мөс шиг л мөс байна. Хүндрэлтэй байсан ч бариандаа орж чадлаа. Хоёр гараагаа дуусгах зорилготой байгаа. Эхнийхээ гарааг амжилттай дуусгалаа.

Уг нь тайван эхэлсэн. Том зам болохоор туганы зоолт нь хэцүү байлаа. Гарахдаа тайван, зоригтой гарсан.

Эхнийхээ гарааныхаа тактикаар хоёрдугаар гараандаа гарна. Бүтэн замаа дуусгана гэж үзнэ. Монголчууд анх удаагаа энэ төрлөөр олимпод оролцож байгаа учир хоёр гараагаа бүтэн дуусгана гэж зорино.

А.Ариунбат 20:30 цагаас сүүлийн гараандаа гарна.

ГЭРЭЛ ЗУРГИЙГ Э.ХАРЦАГА, Д.НЯМБИЛЭГ