Сонгинохайрхан дүүргийн нутаг дэвсгэрт зам дагуу алхаж явсан 30 настай эмэгтэйг бүлэг этгээдүүд хүчээр тээврийн хэрэгсэлдээ суулган, бэлгийн хүчирхийлэл үйлдэхийг завдаж, эд зүйлсийг нь дээрэмдсэн хэрэг гарчээ. Тодруулбал “Манай охиныг согтуу хүмүүс машиндаа хүчээр суулгаад, хүчиндэх гэж оролдсон. Мөн цүнхтэй эд зүйлсийг нь аваад явсан” гэх дуудлага, мэдээлэл цагдаагийн байгууллагад бүртгэгдсэн байна. Мөрдөн шалгах ажиллагааны явцад 16-20 насны А нарын бүлэг этгээд согтууруулах ундаа хэрэглэсэн үедээ хохирогчийг автомашиндаа хүчээр суулган, бэлгийн хүчирхийлэл үйлдэхийг завдсан бөгөөд эд зүйлсийг нь дээрэмдсэн болох нь тогтоогджээ. Дээрх этгээдүүд нь өмнө нь удаа дараа гэмт хэрэг үйлдэж байсан нь тогтоогдсон бөгөөд одоогоор мөрдөн шалгах ажиллагаа үргэлжилж байна. Цагдаагийн байгууллагаас иргэдэд шөнө, оройн цагаар гэрэлтүүлэг муутай, хяналтын камергүй, хүн хөдөлгөөн багатай газраар ганцаараа зорчихгүй байх, хувийн аюулгүй байдлаа хангахыг анхаарууллаа.