Эрүүл мэндийн салбарын эмч, ажилчдын үндсэн цалингийн 30 хувийн нэмэгдлийг 2026 оны нэгдүгээр сард олгож эхэлсэн ч цомхотгол хийсэн гэх асуудал хөндөгдөх болсон. Энэ талаар Эрүүл мэндийн сайд Ж.Чинбүрэнгээс тодрууллаа.

Тэрбээр "Эрүүл мэндийн салбарын эмч, ажилчдын цалин, боловсролын салбарын ажилчдын цалинтай харьцуулахад өөр системтэй. Нэг үгээр хэлбэл, цалингийн төсөв гэж байдаггүй бөгөөд гүйцэтгэлийн санхүүжилтээр цалинждаг. Эрүүл мэндийн салбарт ажиллаж буй эмч, ажилчдын цалинг 2026 оны нэгдүгээр сард үндсэн цалинг 30 хувь нэмсэн. Мөн салбартаа олон жил ажилласны нэмэгдэл, эрдмийн зэрэг болон хортой нөхцөлд ажилласны нэмэгдлээс гадна орон нутгийн бүсэд ажиллаж байгаа эмнэлгийн ажилчдад Засгийн газрын 2024 оны тогтоолын дагуу нэмэгдэл олгож байна. Үүнээс гадна эрүүл мэндийн салбарт ажиллаж буй ажилчдад илүү цагийн нэмэгдлийг 30 хувиас тооцож олгож байгаа. Мөн эмч нарт үр дүнгийн урамшууллыг нэмэгдсэн 30 хувиас тооцож олгож эхэлсэн.

Улсын төсвөөс Эрүүл мэндийн яам 190 гаруй тэрбум төгрөгийн дэмжлэг авсан.

Нөгөөтэйгүүр, эмч, эмнэлгийн ажилчдыг орон тооны цомтголд оруулж төсвийг бүрдүүлсэн гэж ойлголт байгаа нь ташаа юм. Цомхотголын тухайд өнгөрсөн 2025 оны зургадугаар сард гарсан Засгийн газрын тогтоолын дагуу давхардсан орон тоог бууруулах ажлыг хийсэн. Тухайлбал, нийслэл, хөдөө орон нутгийн эрүүл мэндийн салбарт ажиллаж буй давхардсан удирдлагыг цомхотгосон болохоос эмч, сувилагч нарын тоог бууруулаагүй.

Харин зарим нэг сумын эрүүл мэндийн төвүүдэд жирэмсний амралттай ажилтан, хүүхэд харах амралттай байсан эмч, ажилчдыг нэмэгдлээс хассан байсан. Учир нь 2025 оны сүүлийн гурван сард ажиллаж байсан ажилчдын тоогоор тооцоолж цалин нэмсэн. Цалингийн нэмэгдэлд ороогүй эмч, сувилагчид албан ёсны хүсэлтээ холбогдох газарт илгээгээрэй гэж мэдэгдсэн. Ирүүлсэн хүсэлтийг үндэслэн цалинг тавина гэж мэдэгдсэн. Иймд эмнэлгийн захиргааны ажилчид ажилчдынхаа эрхийг ашгийг хамгаалахын тулд ухаалаг байх шаардлагатай" гэлээ.

Дашрамд дурдахад, Засгийн газрын тогтоолын дагуу ТҮЭМ, ТҮМ, ТҮ-ийн ангиллаар цалинждаг эрүүл мэндийн салбарын эмч, ажилтнуудын үндсэн цалинг 2026 онд багтаан 3 сая төгрөгт хүргэхээр дараах үе шаттайгаар нэмэгдүүлнэ.

• 2026 оны нэгдүгээр сарын 1-ний өдрөөс – 30 хувиар,
• 2026 оны наймдугаар сарын 1-ний өдрөөс – 9 хувиар,
• 2026 оны есдүгээр сарын 1-ний өдрөөс – 9 хувиар,
• 2026 оны аравдугаар сарын 1-ний өдрөөс – 9 хувиар,
• 2026 оны арваннэгдүгээр сарын 1-ний өдрөөс – 9 хувиар,
• 2026 оны арванхоёрдугаар сарын 1-ний өдрөөс- 9 хувиар тус тус нэмэгдүүлэх юм байна.