Долдугаар сарын эхнээс үргэлжилсэн 18 өдрийн борооны улмаас зам дээр 60 гаран удаагийн давтамжтайгаар үер бууж 39 хэсэгт замын хөвөө эвдэрч, 3 хэсэг газарт замын асфальт цөмөрч их хэмжээний хохирол үүсээд байна. Үүний улмаас Тавантолгой-Цагаан хад чиглэлийн нүүрс тээврийн замын хөдөлгөөн тодорхойгүй хугацаанд хаагдаад байгаа юм. Цаг уурын урьдчилсан төлөв байдлын мэдээгээр ойрын өдрүүдэд дахин усархаг бороо орохоор мэдээтэй байна.

Үерийн улмаас гурван уурхайн ачилт бүрэн зогсож, 130 гаруй аж ахуй нэгжийн 10,000 орчим тээврийн хэрэгслийн хөдөлгөөн саатаж, компаниудын үйл ажиллагаанд өнөөдрийн байдлаар сөрөг нөлөө үзүүлээд байна.

“Эрдэнэс-Тавантолгой”ХК нийгмийн хариуцлагын хүрээнд байгалийн давагдашгүй хүчин зүйл тохиолдсонтой холбогдуулан хөдөлгөөн зохицуулалтыг хийж, ажиллаж байгаа албан байгууллагууд, жолооч нарт ахуйн хэрэглээний ариун цэврийн хэрэгсэл, хүнсний тусламж үзүүлэхээр Цагаан Хад чиглэлд тусламжийн цуваа хөдөлгөөд байна.

Гэрээт компаниуд, цагдаагийн тасаг, зам засвар, арчлалтын аж ахуй нэгж болон замын зогсоолд олон хоног саатуулагдсан жолооч нарт энэхүү тусламж хүргэгдэж байгаа ажээ.