Такаичигийн барьсан гар цүнх зарагдаж дууссан, ягаан үзэг нь вирус адил тархсан, дуртай амттан нь хамгийн эрэлттэй бүтээгдэхүүн болсон гээд Японы 64 настай ерөнхий сайд залуусын сонирхлыг соронздон татаж байна. Шүтэн бишрэгчдийн халуурал түүнийг энэ Ням гаригт /2026.02.08/ болох ээлжит бус сонгуульд ялалт байгуулахад хөтөлж магадгүй юм. Такаичи олны дунд нэр хүнд сайтай байгаа учир түүний эвсэл доод танхимын 465 суудлаас 300-г өлхөн авч дөнгөх магадлалтайг энэ долоо хоногт явуулсан судалгаанууд харуулжээ.

Юу юунаас илүү анхаарал татаж буй нь 30-аас доош насны сонгогчид түүнийг хамгийн их дэмжиж байна. Судалгаанаас харахад түүний нийт дэмжигчийн дунд энэ насныхны эзлэх хувь даруй 90 давжээ. Харин нас, бүлэг ялгахгүйгээр түүний нийт дэмжлэг 60 хувьтай байна.

Такаичигийн барьдаг цүнх "Hamano" брэндийнх. Тус брэндийн захирал Таканори Кобаяаши 900 ам.долларын үнэтэй хар савхин цүнхийг авахаар дугаарлах 20, 30 насны залуусыг хараад цочирдсон гэдгээ ярьжээ. Угтаа бол тус цүнхийг 40, 50 насныхан илүү сонирхдог аж.

Үүний зэрэгцээ Такаичигийн парламентын чуулганы үеэр тэмдэглэл хөтөлж байсан ягаан өнгөтэй үзгэн бал, галт тэргээр зорчихдоо идэж байсан сам хорхойтой цагаан будааны жигнэмэгийг олон нийт ихээр сонирхож байна.

Такаичи цахим орчин дахь дэмжигчдийн тоогоороо Либерал ардчилсан нам дотроо болон өрсөлдөгч нараасаа хол түрүүлжээ. Түүний "Х" хаягийг 2.6 сая хүн дагадаг бол сөрөг хүчний намын Ёшико Нодаг дөнгөж 64 мянга орчим хүн дагаж байна. Мөн түүний хувийн үнэлгээ Либерал ардчилсан нам дотроо бусдаасаа бараг хоёр дахин өндөр байгааг "NHK"-ийн танилцуулсан судалгаанд дурджээ.

"K-Pop Demon Hunters"-ийн дууг Ли Жэ Мёнтой хамт бөмбөрөөр тоглосон, Италийн ерөнхий сайдад итали хэлээр төрсөн өдрийн мэндчилгээ дэвшүүлсэн зэрэг нь Такаичигийн нэр хүндийг залуусын дунд онц ихээр өсгөсөн.

Гэлээ гээд хүн бүхэн Такаичийг дэмжээгүйг сануулах хэрэгтэй. Тухайлбал, 37 настай гэрийн эзэгтэй Томоми Кавамүра "Такаичигийн цахим орчин дахь нэр хүндийг биширсэн. Гэхдээ хэнд саналаа өгөхөө шийдээгүй байгаа. Миний санааг хамгийн их зовоож буй зүйл бол үнийн өсөлт" гэсэн юм.