Сингапурт болсон агаарын тээврийн шоуны үеэр компаниуд хамгийн сүүлийн үеийн арилжааны нисэх онгоцууд болон нисэхийн технологио танилцуулсан. Тэр дундаас Хятадын төрийн өмчит онгоц үйлдвэрлэгч "Comac" онцгойлон олны анхаарлыг татжээ. "Comac"-ийн хувьд энэ шоу нь дэлхийн хамгийн хурдацтай хөгжиж буй нисэхийн зах зээл болох Ази-Номхон далайд байр сууриа зарлаж, "Airbus", "Boeing"-той өрсөлдөж чадна гэдгээ харуулах боломж байв.

Тус компанийн "C919" онгоц хоёр жилийн өмнө анх удаа Хятадын газар нутгаас гарч, Сингапур луу нислэг үйлдсэн. "C919"-ийг "Airbus A320neo" болон "Boeing 737 MAX" онгоцуудтай өрсөлдүүлэхээр зохион бүтээсэн аж.

"Comac"-ийн 150 гаруй онгоц одоогоор Хятаддаа идэвхтэй нислэг үйлддэг. Мөн Лаос, Индонез, Вьетнамд дотоодын нислэг үйлддэг.

Харин Бруней, Камбож улсууд "Comac"-ийн онгоцыг худалдан авахаар захиалгаа өгөөд байгаа аж. Нийт хэчнээн захиалга гадаадаас болон дотоодоос авсан нь тодорхойгүй. Гэхдээ зөвхөн Хятадын агаарын тээврийн компаниуд л гэхэд 1000 гаруй онгоц захиалсан гэх ба үүнээс 10 гаруйг нь л нийлүүлжээ.

Олон улсын агаарын тээврийн холбоо буюу "IATA"-ийн ерөнхий захирал Вилли Уолш хэлэхдээ "Миний бодлоор ‘Comac’ дэлхийн өрсөлдөгч болох нь цаг хугацааны асуудал. Жаахан цаг авах л байх. 10 юм уу 15 жилийн дараа бид "Boeing", "Airbus", "Comac" гурвыг зэрэгцүүлж ярьдаг болох байх. Ямартай ч тэд ирээдүйн тоглогч мөн гэдэг нь эргэлзээгүй" гэсэн юм.