“Сэргэлэн” дэд станцын гүйцэтгэл 92 хувьтай үргэлжилж буй бөгөөд энэ онд бүрэн ашиглалтад оруулах юм. Тус дэд станц нь баруун талдаа Сонгинохайрхан, зүүн талдаа Налайхын дэд станцуудтай холбогдож, Улаанбаатар хотын эрчим хүч дамжуулах транзит станцын үүрэг гүйцэтгэнэ.

Төслийн хүрээнд 100 мВт-ын нарны цахилгаан станц, 90 мВт-ын цахилгаан хуримтлуурын станц барих аж.

Төр, хувийн хэвшлийн түншлэлээр хэрэгжүүлэх энэхүү бүтээн байгуулалтын гүйцэтгэгчийг хоёрдугаар сард багтааж сонгон шалгаруулна гэдгийг өчигдөр /2025.02.03/ Улаанбаатар хотын захирагч Х.Нямбаатар өөрийн цахим хуудсаар дамжуулан танилцуулав.

Тэрбээр "Хүннү хотын инженер хангамжийн ажлын хүрээнд барьж буй Сэргэлэн дэд станцыг энэ онд ашиглалтад оруулна. Тус станцын бүтээн байгуулалтын хүрээнд мөн 100 МВт нарны панел, 90 МВт батарей хуримтлуурын станц барина. Дээрх станцууд нь баруун талдаа Сонгинохайрхан дэд станц, зүүн талдаа Налайхын дэд станцтай холбогдож, хотын эрчим хүч дамжуулах транзит болох юм. Хот эрчим хүчний өсөн нэмэгдэж буй хэрэгцээг хангахын тулд өнгөрсөн жилүүдэд Бөөрөлжүүтийн 300 МВт станц, Багануурын 50 МВт батарей хуримтлуурын станцыг ашиглалтад оруулсан. Цаашид ч Улаанбаатар хотын цахилгаан, дулааны эх үүсвэрийг тасалдалгүй болгох хүрээнд олон төсөл, хөтөлбөр хэрэгжүүлнэ.  "Сэргэлэн" дэд станцыгг 90 мВт-ын цахилгаан хуримтлуурын станцтай  холбож, оргил ачааллын үед төвийн бүсийн эрчим хүчний системийн ачааллаас хуваалцах байдлаар давхар ашиглах юм. Энэ хавар барилгын ажил нь эхлэх дулааны 5-р цахилгаан станц, "Сэргэлэн” дэд станц, 100 мВт-ын нарны цахилгаан станц, 90 мВт-ын цахилгаан хуримтлуурын станц зэрэг шинэ эх үүсвэрүүд ашиглалтад орсноор Улаанбаатар хотод эрчим хүчний доголдол үүсэхгүй байх нөхцөл бүрдүүлж байгаа" гэв.