ОХУ даяар саяхан болсон хүчтэй цасан шуурга Путины дэглэмийн хоёр нүүрийг илчилжээ. Тодруулбал, Кремль Украин дахь цэргийн ажиллагаагаа барууны орнуудын зүгээс учруулж буй зохиомол аюул заналхийллээс хамгаалж буй арга хэмжээ гэж зөвтгөдөг. Гэсэн атлаа уур амьсгалын өөрчлөлтөөс үүдэлтэйгээр Оросын ард түмэнд учирч буй бодит аюулыг үл тоомсорлож байна гэж үзэв.

Уур амьсгалын хямралаас үүдэлтэй өвлийн эрс тэс цаг агаар оросуудад улам бүр хүндрэл учруулж байна. Он цагийн элэгдэл болон дайнаас болоод дэд бүтцүүд муудсан нь асуудлыг улам хүндрүүлж байгаа аж. Уур амьсгалын өөрчлөлт нь ихэвчлэн дулааралтай холбоотой байдаг. ОХУ-ын хувьд яг үнэндээ хэт халалт, ойн түймэр, ган гачиг, үер, мөнх цэвдэг хайлалт бараг хэвийн үзэгдэл болсон. Дэлхийн дулаарал даамжрах тусам цаг агаар улам эрс тэс, улам л таамаглахын аргагүй, ноцтой болох магадлалтай.

Калининград хотод л гэхэд зөвхөн сүүлийн нэг сарын хугацаанд 2001 оноос хойших хамгийн их цас, Камчаткад 30 жилийн хугацаанд үзэгдээгүй хамгийн их цас, Москвад 200 гаруй жилийн хугацаанд ороогүй их цас оров. Үүнээс үргэлжлээд мөн л хэдэн 10 жилийн турш үзэгдээгүйгээр онцгой хүйтэрчээ. Мөн Краснодар, Мурманск мужуудад цас орж, цахилгааны шугам мөстсөний улмаас нисэх онгоцны буудлууд хаагдан, зам түгжирч, цахилгаан тасарсан.

ОХУ-ын хувьд урьд өмнө байгаагүй өвлийн улирал тохиосныг сэрэмжлүүлэх дуудлага гэж ухаарах ёстойг "Moscow Times" хэвлэлд сануулжээ.

Олон нийтийн дунд уур амьсгалын өөрчлөлт гэх ойлголтод үл итгэсэн, үгүйсгэсэн хандлага өргөн тархсан. Гэвч Оросын энэ өвлийн цаг агаарыг бодит аюул заналхийлэл гэж авч үзэхээс аргагүй аж. Тус улс дэлхийн дунджаас илүү хурдан дулаарч буй бөгөөд уур амьсгалтай холбоотой цочролд онцгой өртөмтгий байна. Тэр дундаа хамгийн өртөмтгий бүлгээр Украин дахь дайн болон чулуужсан түлшний ялгаралтад хамгийн бага нөлөөтэй ядуус, хөдөө тосгоныхон болон уугуул иргэдийг нэрлэж болно.

Үндсэндээ ихэнх оросуудад уур амьсгалын өөрчлөлт ашиггүй. Агаарын хэм хэт өслөө гээд илүү их ургац хураах, эрчим хүчний хэрэглээ буурах гэсэн юм байхгүй. Харин ч урьдчилан таамаглах аргагүй цаг агаарын үзэгдлүүд хөдөө аж ахуй, тээвэр, ложистик, эрчим хүчний системд илүү их эмх замбараагүй байдал авчрах болно.

Кола хойгт 20 жилийн турш амьдарсан самичууд зэрэг уугуул иргэд өөрчлөлтийг олон жилийн өмнөөс мэдэж байв. Гэтэл өнөөдөр хот суурин газарт байгалиас хол амьдарч буй хүмүүс хүртэл асуудлын үр дагаврыг бэлхнээ харах боллоо. Самичуудын хувьд цас удаан хугацаагаар орж, араас нь гэнэт дулаарснаар уламжлалт цаа бугын аж ахуйгаа эрхлэхэд хүндрэлтэй болжээ. Цас багатай, мөс ихтэй байх нь цаа буга гэмтэж бэртэх нөхцөл болдог. Өөрөөр хэлбэл, нэг хайлж, нэг хөлдсөн цаг агаар нь ердийн хүйтэн өвлөөс илүү хүнд нөхцлийг үүсгэдэг аж.

Хунгар цас, мөстсөн зам зэрэг нь дэд бүтцийн хувиад яриангүй асуудал мөн. Авто зам, төмөр зам саатаж, цахилгаан дамжуулах шугам тасрах нь илүү их гэмтэл бэртэл дагуулна гэсэн үг. Хөдөө аж ахуйн салбарт ч эрс тэс цаг агаар халгаатай. Цас гэнэт хайлж, гэнэт хөлдөх нь ургац сүйтгэх эрсдэлтэй.

Хамгийн гол нь Оросын эрх баригчид уур амьсгалын өөрчлөлтийн сорилтод бэлтгэлгүй шахуу байна. Улс орон даяар цахилгаан, дулаан, ус зэрэг дамжуулах сүлжээний 40 хувь нь ноцтой элэгдэлд орсон. Зарим бүс нутгийн хувьд даруй 80 хувь нь элэгдэлд орсон. Тухайлбал, Мурманск хотод нурсан таван цахилгаан дамжуулах цамхагийн хоёр нь 60 жилийн настай байсан бол бусад хоёр нь 40 жил дөхөж байжээ.

Орчин үеийн Орос улсын хамгийн чинээлэг баян цаг үеийг Путин буруу ашигласан гэж үзэж байна. Энэ он жилүүдэд эрх баригчид дэд бүтцэд хөрөнгө оруулах бус олигархуудад ашиг хонжоо олгох буруу шийдвэр гаргаж ажиллажээ.

ОХУ-д одоо байгаа зүйл гэвэл ердөө Зөвлөлтийн үлдэгдэл. ЗХУ задарснаас хойших хэдэн 10 жилд тэдгээр дэд бүтцэд огт засвар үйлчилгээ, сайжруулалт хийгээгүй гэхэд хилсдэхгүй. Оросын эрх баригчид өнөөдөр анхаарлаа ч тэр, төсвөө ч тэр тэс өөр зүйлд хандуулж байна. Тэд уур амьсгалын өөрчлөлтийн эсрэг тэмцэлд биш Украины дайнд анхаарч байна. Хэрвээ тэд Оросын аюулгүй байдалд үнэхээр санаа тавьдаг байсан бол бат бөх дэд бүтэц болон уур амьсгалын өөрчлөлтөд чиглэсэн аливаа арга хэмжээнд хөрөнгө оруулах байлаа.

Хэт төвлөрсөн эрчим хүчний систем нь тус улсын хувьд бас нэгэн асуудал. Мурманск хот Кола хойгийн цөмийн цахилгаан станцаас хамааралтай. Гэтэл Мурманск бол дэлхийн хамгийн том Арктикийн бүсийн хот. Ийм том хот Оросын өргөн хүрээтэй эрчим хүчний сүлжээтэй зөвхөн ганц цахилгаан шугамаар холбогддог. Тиймээс агаарын хэм 20 хүрч хүйтрэх үед цахилгаан тасрах эрсдэл энүүхэнд байдаг. Байгаль орчны бүлгүүдийн ярьдаг сэргээгдэх эрчим хүчний эх үүсвэрүүдийн сүлжээ нь Мурманск шиг алслагдсан хотод илүү тохиромжтой байж мэднэ.

Уур амьсгалын хямрал гэдэг бол урьдчилан таамаглах аргагүй байдал гэсэн үг. Оросын зарим хэсэгт сард нэг удаа цас ордог бол зарим хэсэгт нь олон жилд нэг удаа цас орж байна. Энэ эрс тэс байдал нь ердийн л үзэгдэл болсон.

Үүний зэрэгцээ уур амьсгалын өөрчлөлтийн бодит үр дагавар нь Кремлийн Арктикийн амбицыг улам алсруулж байна. Мөс хайлах, ус, салхины урсгал тасалдах, цаг агаар эрс тэс болох зэрэг нь Арктикийн тээврийн маршрутад заналхийлдэг. Энэ мэт олон эрсдэлийг харгалзан үзвэл Оросын эрх баригчид хөршүүдтэйгээ тэмцэхийн оронд илүү бодит аюул заналхийлэлд анхаарал хандуулах цаг нь болсон бололтой.