Нийгэмд хараалын үг хэллэгийн хэрэглээ нэмэгдэж буйтай холбогдуулан тус улсын Үнэн алдартан сүмийн тэргүүн хараал хэлэхийг багасгах арга хэмжээ авахыг Төрийн Думын хууль тогтоогчдод уриалжээ. Харин тус улсын Шинжлэх ухааны академийн хэл шинжлэлийн мэргэжилтнүүд хараалын үг хэллэгийг хамгаалахыг уриалж байна. "Оросууд хараал хэлэх нь илт нэмэгдсэн" гэж В.В.Виноградовын нэрэмжит Орос хэлний хүрээлэнгийн судлаач Владимир Пахомов өчигдөр (2026.02.02) төрийн өмчит РИА Новости мэдээллийн агентлагт өгсөн ярилцлагадаа хэлжээ.

"Хэдийгээр мэргэжлийн бус сонсогдож байгаа ч хэл шинжлэлийн мэргэжилтнүүд хараалын үгийг хамгаалж, хадгалах ёстой гэсэн санааг дэвшүүлж байна. Бид маш их хүч чадалтай энэхүү өвөрмөц үгсийн бүлгийг алдахгүйн тулд садар самуун үгийн хэрэглээг хязгаарлах хэрэгтэй" гэв. Тэрбээр Үнэн алдартан сүмийн тэргүүн патриарх Кириллийн олон нийтийн садар самуун үгэнд тодорхой хязгаарлалт тавих тухай саяхан гаргасан хүсэлтийг дэмжиж байгаагаа илэрхийлсэн. Гэсэн хэдий ч хараалын үг, хэллэгийг устгах гэж оролдохын оронд "хамгаалах, хадгалах" шаардлагатайг онцолжээ. Улмаар оросуудад садар самуун үгсийг хэзээ, хэрхэн зөв хэрэглэхийг зааж сургах хэрэгтэй гэж Пахомов үзэж байна.

Патриарх Кирилл өнгөрөгч долоо хоногийн Баасан гаригт (2026.01.30) Думын доод танхимын хууль тогтоогчдод хандан үг хэлэхдээ, Орост одоогоор байгаа "доод түвшний үг хэллэгийн оюун санааны өвчин"-ийг арилгах "арга олохыг" уриалсан.

"Олон нийтийн өмнө доромжлохыг хуулиар хөнгөн гэмт хэрэг гэж үздэг ч практик дээр нийгэмд улам бүр хүлээн зөвшөөрөгдөж байна" гэж тэрбээр хэлжээ. Хараалын үг хэллэгийг цагдаа, прокурорууд тодорхойлно гэж заасан Оросын хуулийн дагуу олон нийтийн газар доромжлох үг хэрэглэвэл торгууль ногдуулах эсвэл 15 хүртэл хоног баривчлах ял оноодог. "Бид хараалын үг хэлэхийг багасгах арга олох хэрэгтэй. Энэ бол хүмүүсийн оюун ухаан, тэр ч байтугай зүрх сэтгэлийн төлөөх тулаан" гэж патриарх Кирилл мэдэгджээ. "Хэрэв одоо бид архидалттай тэмцэхийг хичээж байгаа шигээ доромжлолтой тэмцэж чадвал Оросын соёлыг бузарлаж, гажуудуулж, хүмүүсийн харилцаанд хор хөнөөл учруулсан уламжлалыг эвдэх болно" гэж тэрбээр хууль тогтоогчдод мөн хэлсэн байна.