Ус цаг уур, орчны судалгаа, мэдээллийн хүрээлэнгээс 2026 оны хоёрдугаар сарын зудын урьдчилсан төлөвийг хиймэл дагуул, газрын ажиглалтын мэдээнээс үндэслэн гаргажээ. Тодруулбал, ган-зуншлагын төлөв байдлыг 2025-2026 оны өвөл хаврын бэлчээрийн даац, бэлчээрийн ургац, агаарын температур, хур тунадасны дундажтай харьцуулсан хазайлт, цасны зузаан болон агаарын температур, хур тунадасны урьдчилсан төлөв зэрэг мэдээлэлд үндэслэн боловсруулжээ. 2026 оны хоёрдугаар сарын зудын урьдчилсан төлөвөөс харахад мал өвөлжилт нийт нутгийн таван хувьд нэн их, 16 хувьд их, 50 хувьд дунд, 17 хувьд бага зэрэг хүндрэлтэй, 11 хувьд хүндрэлгүй байхаар гарчээ.

Өвөлжилтийн байдал Сэлэнгэ, Төв, Булган, Баян-Өлгий, Увс, Дархан-Уулын ихэнх, Ховд, Завхан, Өвөрхангай, Баянхонгор, Хэнтий, Дундговийн зарим нутгаар их хүндрэх төлөвтэй байна.

Иймд мал өвөлжилт, хаваржилт хүндэрч буй болон хүндэрч болзошгүй бүс нутгуудад онцгойлон анхаарч, цаг уурын байгууллагаас гаргадаг богино, дунд, урт хугацааны цаг агаарын урьдчилсан мэдээг тогтмол авч ашиглах, цагийн байдал хүндэрсэн үед авч хэрэгжүүлэх арга хэмжээний бэлтгэлийг бүрэн хангаж ажиллахыг зөвлөж байна.