Ипотекийн зээлийн асуудал иргэдийн анхаарлыг татсан гол сэдэв байсаар байна. Зээлийг хэрхэн үргэжлүүлэхээс гадна урьдчилгаа төлбөр, хүү, журмын асуудлыг эргэн харахыг иргэд болон барилгын компаниуд сануулсаар байгаа билээ.  Тэгвэл энэ асуудлыг Барилга хот байгуулалтын сайд Х.Баделхан толгой мэдэн шийдэж чадахгүй нь. Учир нь энэ асуудлыг ОУВС-гийнхантай хэлэлцэж шийдэх аж.   Ипотекийн хөтөлбөрийг ирэх есдүгээр сарын сүүл гэхэд Засгийн газарт шилжүүлэх юм байна.

Үүнээс гадна ипотекийн зээлийн урьдчилгааг бууруулж, сонгуулийн өмнө иргэдэд боломж олгохоор МАН-ын засаг төлөвлөж байгаа бололтой.  Учир нь  ипотекийн шинэ журмаар анх удаа орон сууцтай болж буй иргэдийн зээлийн урьдчилгаа төлбөрийг таван хувиар бууруулж 25 хувьд хүргэхээр судалж байгаагаа Барилга хот байгуулалтын сайд Х.Баделхан мэдээлсэн.  Хэрэвзээ зээлийн урьдчилгааг бууруулснаар ипотекийн зээлд хамрагдах чадвартай өрхийн тоо 31 мянган болж өсөх гэнэ.  Монголбанкны тайланд дурдсанаар  энэ оны зургадугаар сард 1100 гаруй иргэнд 82 тэрбум төгрөгийн ипотекийн зээл шинээр олгожээ. Үүний 42 хувийг хөтөлбөрийн, 58 хувийг банкуудын өөрийн хөрөнгийн эх үүсвэрээр санхүүжүүлж байна. Он гарсаар Сангийн яамнаас нийт 60, Монголбанкнаас 96 тэрбум төгрөгийг ипотекийн санхүүжилтэд олгожээ. Улаанбаатар хотын 152 хооронд орон сууцны эрэлт нийлүүлэлтийн судалгаа явуулахад 252 мянган өрх ипотекийн зээлд хамрагдах хүсэлтэйгээ илэрхийлжээ. Үүнээс арилжааны банкны шалгуурыг 13 мянга өрх хангаж байгаа аж. Мөн нийслэлийн хэмжээнд 33 мянга гаруй орон сууц борлогдоогүй байна.