ОХУ-ын нийслэл Москва хотноо үргэлжилж буй бөхийн чөлөөт барилдааны насанд хүрэгчдийн дэлхийн аварга шалгаруулах тэмцээнээс эмэгтэйчүүдийн 59 кг-ын жинд аваргын алтан медаль хүртсэн  Соронзонболдын Батцэцэг маргааш 19,00 цагт эх орондоо ирэхээр болжээ.
Тэрээр хэдхэн цагийн өмнө дэлхийн аваргын төлөөх шийдвэрлэх тулаанаа хийж, БНХАУ-ын тамирчин Жан Ланьтай аваргын төлөө барилдаж,  8:0 харьцаатай өрсөлдөгчөө буулган авсан байна. Тэрбээр ийнхүү чөлөөт бөхийн дэлхийн аваргаас медаль хүртсэн Монголын зургаа дахь эмэгтэй, харин аваргын алтан медаль хүртсэн анхны эмэгтэй тамирчин болж байна.

П.Наран