Нийслэл хот 2026 оныг “Бизнес эрхлэгчдийг дэмжих жил” болгон зарласантай холбогдуулан тендерт оролцох иргэн, аж ахуйн нэгжүүдэд зориулсан “Open procurement” сургалт, өдөрлөгийг өнөөдөр буюу 2026 оны нэгдүгээр сарын 30-ны өдөр зохион байгуулж байна.

Нийслэлийн хэмжээнд 2025 онд 267 төсөл, арга хэмжээ төлөвлөснөөс 92 хувийн гүйцэтгэлтэй хэрэгжүүлсэн бөгөөд эдгээрийн 97 хувьд дотоодын аж ахуйн нэгжүүд шалгарч ажилласан байна. Салбараар нь авч үзвэл:

• Авто замын салбарт -48 төсөл
• Барилга байгууламжийн -44 төсөл
• Барилгын засварын -110 төсөл, арга хэмжээ тус тус хэрэгжжээ.

Харин 2026 онд нийт 1.1 их наяд төгрөгийн өртөг бүхий 200 орчим төсөл, арга хэмжээнд Орон нутгийн болон төрийн худалдан авалтын тухай хуулийн дагуу сонгон шалгаруулалт явуулахаар төлөвлөсөн байна. Өнөөдрийн байдлаар 102 төсөл, арга хэмжээг нээлттэй зарлаад байгаа бөгөөд хуульд зааснаар тавдугаар сарын 31-ний өдрөөс өмнө шалгаруулалтыг зохион байгуулах шаардлагатай юм.

Төрийн худалдан авах ажиллагааны газрын дарга Ц.Батзул:

-Нийслэлийн Засаг даргын Тамгын газраас тендерт оролцогчдод зориулж цахим системээр хэрхэн алдаагүй оролцох талаар сургалт зохион байгуулах хүсэлт ирүүлсэн. Хуулийн дагуу Төрийн худалдан авах ажиллагааны газар цахим системийн ашиглалт, хөгжүүлэлтийг хариуцдаг бөгөөд систем хэвийн ажиллаж байна.

Гэвч зохион байгуулалтын асуудлаас шалтгаалж хиймэл ачаалал үүсч, систем гацах тохиолдол гардаг. Тухайлбал, захиалагч байгууллагууд Даваа гаригийн өглөөний 09:00 цагт бүх тендерээ нэгэн зэрэг нээхээр зарладаг. Манай цахим систем цагт 200 тендер нээх ачааллыг саадгүй даах чадвартай.

Харин системийг цагт 700 тендер боловсруулах хүчин чадалтайгаар хөгжүүлэх нь бусад үедээ ашиглалтгүй, илүүдэл хөрөнгө оруулалт болох эрсдэлтэй. Иймд бид зохистой түвшинд хөгжүүлж, ашиглаж байна.

Захиалагч байгууллагуудад хандаж хэлэхэд, оролцогч талуудын оролцоог хангах үүднээс сонгон шалгаруулалтыг Мягмар гаригт эсвэл Даваа гаригийн үдээс хойш нээх зэрэг уян хатан зохион байгуулалт хийх нь зүйтэй. Амралтын өдрүүдээр лавлагаа, тодорхойлолт гаргадаг байгууллагууд амардаг тул оролцогчгүй тендер үүсэх эрсдэлтэй. Ингэснээр төр ч ажлаа алдаж, хувийн хэвшил ч оролцох боломжоо алддаг нөхцөл байдал үүсдэг гэдгийг хэллээ.