Түргэний эмч намайг хүүгийн минь биед хүргээгүй | News.MN

Түргэний эмч намайг хүүгийн минь биед хүргээгүй

Хуучирсан мэдээ: 2018.08.07-нд нийтлэгдсэн

Түргэний эмч намайг хүүгийн минь биед хүргээгүй

Түргэний эмч намайг хүүгийн минь биед хүргээгүй

Зуны нэгэн үдэш нийслэлийн Сүхбаатар дүүрэгт байрлах “Эко шинэс” эмийн сангийн гадаа энэ харамсалтай хэрэг гарсан юм. Ээждээ эрхлээд гарсан хоёрдугаар ангийн сурагч хүү бусдын л адил тоглон наадан гүйхдээ золгүй тохиолдлоор амиа алдсан билээ. “Миний хүү хоолоо идээрэй” гээд дуудахын завдалгүй зэргэлдээх эмийн сангийн тогтой хаалганаас барьснаас болж хүү амиа алдсан юм. Ойр хавийн хүмүүс өнөөх эмийн сангийн хаалгыг хэдэн өдрийн өмнө тогтой гэлцэж байсан ч хариуцсан эзэд нь “чих нь дүлий” байсаар хүүгийн аминд хүрчээ. Одоогоос сар гаруйн өмнө /2018.06.25/ хүүгийн ээж Ч.Мөнхсайхан хүүгээ алдсандаа итгэж ядан нүдэндээ нулимс  дуслуулан “Хүний аминд хүрчхээд байхад албаны хүмүүс одоо хүртэл чимээгүй байна. Хүү чинь өнгөрчихлөө гэсэн эмчийн үгэнд одоо ч итгэж чадахгүй нь” хэмээн ярьж байжээ. Түүнтэй дахин ярилцахаар гэрт очлоо. Биднийг очиход эмийн сангийн үйл ажиллагааг зогсоосон талаар ойр хавийн иргэд ярьж байсан юм.


-Золгүй явдлаас хойш сар гаруйн хугацаа өнгөрчээ. Энэ хугацаанд хэрэг хэрхэн шийдэгдэж байна вэ. Шүүх эмнэлгийн байгууллагаас хүүгийн тань үхлийн шалтгааныг тодорхойлсон уу?

-Эгч нь дөнгөж сая Сүхбаатар дүүргийн цагдаагийн нэгдүгээр хэлтсийн байцаагчтай уулзчихаад ирлээ. Шүүхийн шинжилгээний хариу зуун хувь тогноос үүдэлтэйгээр нас барсан гэж гарсан. Эмч нар дотор эрхтэн нь эрүүл боловч зүрх нь зогссоны улмаас амиа алдсан байна гэж бидэнд хэлсэн. Одоогоор эмийн сангийн үүдний хэсэгт цахилгаан цэнэг яагаад үүссэнийг тогтоохоор мэргэжлийн байгууллага ажиллаж байгаа. Тог юунаас үүдэлтэй болохыг мэргэжлийн хяналтын газраас дахин нарийвчилсан дүгнэлт гаргана гэсэн боловч хариуцсан мэргэжилтэн нь амарчихсан байна. Тийм учраас цахилгааны дүгнэлтийг хүлээж байна.

-Эмийн санч эсвэл, эмийн санг түрээслэгч хоёр хаалга тогтой гэдгийг мэдэж байж яагаад бусдад анхааруулаагүй юм бол?

-Хаалга юунаас болж цахилгаанжсаныг тогтоочхоод надаас дахин байцаалт авна гэсэн.

Тэр эмийн санг түрээслээд гурав хонож байхад энэ хэрэг гарсан юм билээ. Би энэ хорооныхоо эргүүлээр ажилладаг байхад олон удаа “Дэлгэрэх” төвд мэдэгдэл өгсөн боловч нэг удаа ч авч байгаагүй. “Дэлгэрэх” төвийг хариуцсан гэх эрэгтэй “Ажлын садаа, наад цаасаа аваад гар” гэж манай ажилчдад хэлдэг байжээ.  Хэрвээ тэр хүн нэг удаа ч болов уншаад үзсэн бол эмийн сангийн гаднах тохижилтын аюулгүй байдлыг хангасан байх ёстой.

Тухайн үед хүргүүлсэн мэдэгдлийг уншаад хариуцлагатай ажилласан бол өнөөдөр миний хүү амиа алдахгүй байлаа. Хүүгийн минь хэрэг явдлаас хойш надтай олон хүмүүс уулзсан. Тэр дундаа хүүхдийн байгууллагаас манай энэ хавийн тоглоомын талбайн ил задгай утасны асуудлыг цэгцлэх асуудлаар хорооны Засаг даргад хандсан байна лээ.

-Мэргэжлийн хяналтын дүгнэлт яагаад удаашраад байгаа юм бол?

-Хэрэг мөрдөн байцаалтын шатандаа явж байна. Шүүх эмнэлгийн дүгнэлтэд зуун хувь тогноос үүдэлтэй гэсэн хариу гарсан. Гэхдээ шинжилгээний хариунд нэг эргэлзээтэй зүйл байсан. Тэр нь юу гэхээр тухайн үед хүүд минь анхны тусламж үзүүлсэн бол хүү амьд байх талаар бичсэн байна лээ. Түргэний эмч  ирээд биед нь хүрч болохгүй шүү гээд намайг хүргээгүй.

Хавь ойрын хүмүүс хүүгээ нойтон шороонд бушуухан бул хэрэв булах юм бол эргээд амьд гарах боломжтой гэж хэлж байсан. Тэгтэл түргэний эмч намайг хүүгийн минь биед хүргээгүй. Өнөөх шүүх эмнэлгийн дүгнэлтэд тэр даруйд нь анхны тусламж үзүүлсэн бол амь гарах боломжтой гээд биччихсэн байсан. Түүнийг уншаад миний сэтгэл маш их эмзэглэсэн.

-Эмийн сангийн эзэд та бүхэнтэй уулзаж танай гэр бүлд туслалцаа үзүүлсэн үү?

-Ажил явдлынх нь үеэр эмгэнэл илэрхийлэхээр ажилтан нь бололтой эрэгтэй, эмэгтэй хүмүүс ирсэн. “Дэлгэрэх” төвөөс одоог хүртэл хүмүүс ирээгүй. Байцаагчийн хэлснээр эмийн санг эрхэлсэн эмэгтэйг хэргийн хариуцагчаар дуудаж байгаа гэсэн. Харин өнөөх эмэгтэй орон нутагт байгаа сураг дуулдсан.

-Энэ хэрэг шийдвэрлэгдэхгүй байгааг таныг зүгээс юу гэж харж байна вэ?

-Бүх зүйл тодорхой байхад хуулийн дагуу шийдэж өгөөсэй гэж горьдож сууна. Бид нарын уй гашуу тайлагдаагүй, хүлээхэд ч бэрх байна. Миний хүүтэй адил хоёр гурван хүүхэд тогонд цохиулаад амиа алдчихаад байхад эрх баригчид яагаад тоохгүй, чих нь дүлий суугаад байгаа юм бэ. Бид хариуцлагыг хэнээс нэхэх билээ. Энэ хайхрамжгүй байдлыг өөрчлөхийн тулд хүний эрхийн тухай хуульд өөрчлөлт оруулаасай. Манай монголд хүний амьдрах аж эрүүл аюулгүй орчинд аж төрөх эрх зөрчигдөж байна. Гаднын оронд золгүй байдлаар амь насаа алдахад даатгалаар шийддэг бол манайд энэ чиглэлийн эрх зүйн зохицуулалт дутагдалтай байгааг ажиглалаа. Цаашид миний хүү шиг хөөрхөн үрс хохироод үлдэхийг зүгээр хараад сууж чадахгүй. Тийм учраас би ч гэсэн эх хүний хувьд дуу хоолойгоо ард түмэндээ хүргэнэ гэж бодож байгаа.

 

10 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2018-08-07 202.55.191.130

hai daa

Avatar

Zochin 2018-08-07 64.119.27.97

Togond tzohuilsan hund garaaraa hurch bolohgui hunii bieiin 70- 80hubi n us bolohr tog shuud damjdag shu.togtoi zuiltei naaldsan hun bval mod geh met tog damjuulahgui zuilr salgaj awna garaaraa hurch bolohgui tzaashid

Avatar

Зочин 2018-08-07 203.91.115.37

Тог юунаас үүдэлтэй болохыг мэргэжлийн хяналтын газраас дахин нарийвчилсан дүгнэлт гаргана гэсэн боловч хариуцсан мэргэжилтэн нь амарчихсан байна.

Avatar

Зочин 2018-08-07 202.179.27.191

Түргэний эмч 2 цагийн дараа ирдэг. Ирчихээд болоогүй хүн загнана. Тэр дор нь адриналин тарьж зүрхний иллэг хийж хиймэл амьсгаа хийх байсан юм.

Avatar

Зочин 2018-08-07 27.123.214.113

Мэргэжил хяналтынх нь хариуг яагаад удаад байгааг нь асуугаад өгчихвөл нилээд тус юмдаа. Улсаас хурдан шийдэж өгнө нтр гээл яриад байсан тэгж байхад өөрт тохиолдоогүй бол боллоо гэсэн шиг тэр мэргэжил хяналтынх хариуг гаргах хүн ь амралтаа авчихсан гэнэ үү аль эсвэл албаар амралтаа авсан хүнд өгөв үү манай монгол улс, улсын хууль ийм арчаагүй. ИИМ УЛСАД АМЬДРАХААСАА ИЧИЖ БАЙНА. Хүүхдээ дагуулаад гудамжинд явахдаа хүртэл айдастай явж байна

Avatar

Увсаас 2018-08-07 66.181.169.66

Олон Нийтийн газар, зах болон задгай худалдааны газаруудад цахилгааны утас нь ил гарсан олон монтажтай, траншейны нүхний таг байхгүй зэрэг маш олон асуудал байна. Засаг захиргааныхан энэ зэргийн асуудлыг судлаад холбогдох байгууллагааар зардал мөнгийг гаргаад шийдэж л болмоор санагдах юм даанч хэн ч хөдөлөхгүй байна.

Avatar

Зочин 2018-08-07 202.21.100.211

Хөгжилтэй оронд иргэн бүр анхан шатны тусламж үзүүлэх чадварыг эзэмшсэн сертификаттай байх ёстой. Зүрхний иллэг хиймэл амьгал хийх чадвартай бол зүрхний зогсоод 4 минутын дотор хүний амьдруулах боломж байгаа

Avatar

Paвcaл 2018-08-07 174.216.10.84

Энэ сурвалжлагч нар хүүгээ алдсан хүний шархыг нь дахин дахин сэдрээж ойр ойрхон сурвалжлага авах юмаа. Цаад эмийн сангаас нь бас мэргэжлийн хяналтынхан мөрөөр нь үүн дээр болон бусад хэргүүд дээр ажиллаж байгааг нь асууж болдоггүй юмуу

Avatar

зочин 2018-08-07 66.181.182.215

хүүхдийн тоглоомын талбай дээр барьсан Иргэн Норов гэгэч хүний байшин л даа төрийн мөнгөөр халаалтаа засуулж тайлбайгаа тосгмож хашаа хатгаад давраад байдаг хүн ш тээ энэ хууль бус байшинг нураагаач нийтийн эрх ашиг нийтийн эзэмшлийн зам талбай чөлөөтэй байлгах хууль журам хэрэгжинэ гэдэг юм байна уу

Avatar

Зочин 2018-08-07 202.55.191.130

хөөрхөн үрс нэгэнт бурхан болсон хойноо яавал хохирохгүй байх вэ? даатгалаар амилуулдаг гэж үү?

NewsMN Гар утасны хувилбар Татах
NEWS.mn

Мэдээллийн эх сурвалж