Ньюс агентлаг өнгөрсөн долоо хоногт дотоодод өрнөсөн үйл явдлыг тоймлон хүргэж байна

Өнгөрсөн долоо хоногт нийслэлчүүдийн хувьд цахилгаан дулаангүй болж хөлдөж үхэхгүйн төлөө тэмцэж өнгөрүүлэв. Өөрөөр хэлбэл, 21 дүгээр зуунд лаа барьж, газ асааж хоол ундтайгаа залгаж үндсэндээ 13 дугаар зуун руу ухарсан долоо хоног болж өнгөрлөө. Тодруулбал, нэгдүгээр сарын 20-ны өглөө 6:10 цагийн үед "ДЦС -IV"-ын наймдугаар зууханд гэмтэл гарсан. Гэтэл ДЦС-уудын бүх генераторууд нөөцгүй ажилладаг байна, тиймээс цахилгаан хязгаарлаж засвар хийхээс өөр аргагүй аж. Мөн өнгөрсөн долоо хоногт ойрын хэдэн жилд тохиогоогүй хүйтэрсэн үүнээс үүдэж Бөөрөлжүүтийн цахилгаан станц дээр цахилгаан станцаар дамжуулаад нүүрс орох хэсэгт саатал гарсан. Улмаар 300 мегаваттын хүчин чадалтай ажиллаж байсан Бөөрөлжүүтийн цахилгаан станц 120 мегаваттын хүчин чадалтай ажилласан. Ийм хүндрэлүүд гарснаас шалтгаалаад 160 мегаваттын хязгаарлалт хийсэн. Улмаар айл өрхүүдийн цахилгааныг хэсэгчлэн хязгаарлаж эхэлсэн. Ингэхдээ нэг айлын цахилгааныг 1:00-1:30 цаг хязгаарлана гэсэн боловч бодит байдал дээр 2 цаг зарим газруудад түүнээс дээш цагаар хязгаарлалт хийж ингэснээр айл өрх болон  аж ахуй нэгж, байгууллагуудын дулаан тасалдаж идэр есийн хүйтэн тачигнасан энэ өдрүүдэд хөлдөж үхэх эрсдэлтэй нүүр тулав. Олон хавар нэгэндээ гэгчээр өнгөрсөн жилүүдэд нийслэлд -40 хэм хүртэл хүйтэрч, ДЦС-д гэмтэл гарвал хот тэр чигээрээ хөлдөнө гэдгийг албаныхан хэлж байсан ч салбарын сайд нь "аргалана даа" гэсэн ч үнэн хэрэгтээ энэ салбар аргацаах биш бодит бүтээн байгуулалт хийх шаардлагатай байгааг харууллаа.

Сүүлийн хоёр жилийн хугацаанд 600 орчим мегаватаар эрчим хүчний хүчин чадлыг нэмэгдүүлсэн байна. Тухайлбал, 2024 оноос хойш Бөөрөлжүүлтийн 300 мегаватт хоёр блок ашиглалтад орлоо. Хоёрдугаарт, Сонгино дээр 80 мегаваттын батерей хураагуур ашиглалтад орсон. Мөн Багануур дүүрэгт 50 мегаваттын батерей хураагуурын станц ашиглалтад орсон. Дорноговь аймаг 30 мегаваттын батерей станц ашиглалтад орсон, үүнийг хувийн компани барьж, гүйцэтгэсэн. Ингээд нийт 160 мегаватт батерей хураагуурын станц ашиглалтад оруулаад байна. Одоогоор Сэлэнгэ, Тосонцэнгэл сумдад цахилгаан станц ашиглалтад орно. Гэсэн ч ачаалал нэмэгдээд байна.  2027 оноос Монгол Улсын эрчим хүч хүндрэлд орохгүй" гэж Эрчим хүчний сайд Б.Чойжилсүрэн мэдэгдээд буй.

ДАВОС ХОТНОО БОЛСОН ДЭЛХИЙН ЭДИЙН ЗАСГИЙН 56 ДАХЬ ЧУУЛГА УУЛЗАЛТАД ЕРӨНХИЙ САЙД ОРОЛЦОВ

Мөн өнгөрөгч долоо хоногт Ерөнхий сайд Г.Зандаршатар Швейцарын Холбооны Улсын Давос хотноо болсон  56 дахь удаагийн Дэлхийн эдийн засгийн чуулга уулзалтад Монгол Улсыг төлөөлж Ерөнхий сайд Г.Занданшатар тэргүүтэй төлөөлөгчид оролцлоо. Чуулга уулзалтын эхний өдөр Ерөнхий сайд Г.Занданшатар НҮБ-ын Олон улсын цахилгаан холбооны байгууллагын Ерөнхий нарийн бичгийн дарга, хатагтай Дорийн Богдан Мартыг хүлээн авч уулзав. Багшлахуйгаас суралцахуйд чиглэсэн шинэчлэлийн хүрээнд Монгол Улс хиймэл оюунд суурилсан боловсролын систем рүү шилжиж буйг талууд онцлов. Мөн өдөр Ерөнхий сайд Г.Занданшатартай БНСУ-ын Худалдааны сайд Ё Хан Гү уулзав. Уулзалтаар талууд хоёр улсын хооронд зохион байгуулах өндөр түвшний айчлалуудыг уялдуулах, бизнесийн тогтвортой орчныг бүрдүүлэх чиглэлээр хамтран ажиллах талаар санал солилцлоо. Бан Ги Мүн сантай тогтоосон ойр дотно харилцаанд тулгуурлан өндөр түвшний арга хэмжээ зохион байгуулах асуудлаар ярилцав. Түүнчлэн Ерөнхий сайд Г.Занданшатар БНСУ-ын тэргүүлэх хэвлэл мэдээллийн байгууллагуудын нэг болох “Maekyung Media Group”-т ярилцлага өгөв. Ерөнхий сайдтай тус группийн редактор Юн Воп Суп Дэлхийн эдийн засгийн чуулга уулзалт дахь Монгол Улсын оролцоо болон Монгол, Солонгосын худалдаа, эдийн засаг, иргэд хоорондын харилцаа зэрэг сэдвийн хүрээнд ярилцав. “Яриа хэлэлцээний амин сүнсийг сэргээх нь” сэдвийн дор болж буй энэ удаагийн чуулга уулзалтад 100 гаруй улсын төр, засгийн тэргүүн, олон улсын байгууллага, томоохон корпорациудын удирдлага, иргэний нийгмийн төлөөлөл зэрэг 3000 гаруй төлөөлөгч хуран чуулж байна.
Манай улсын  хувьд энэхүү чуулга уулзалтад өндөр дээд түвшинд оролцсоноор дэлхийн улс төр, эдийн засгийн шийдвэр гаргагчидтай шууд харилцаа тогтоох, улс орны хөрөнгө оруулалтын орчныг өргөн хүрээнд сурталчлах, Засгийн газраас хэрэгжүүлэхээр зорьж буй төсөл, хөтөлбөрүүдэд олон улсын дэмжлэг, хөрөнгө оруулалт татах, шинэ түншлэлийг өргөжүүлэхэд чухал нөлөөтэй юм.

Ц.ДАГВАДОРЖИД БҮХ НАСААР НЬ ХОРИХ ЯЛ ОНООСОН БОЛ Э.НОМИН-ЭРДЭНЭ, Э.ГАН-ЭРДЭНЭ, Х.ЭНХСАЙХАН НАРЫГ ЦАГААТГАВ

Өнгөрсөн долоо хоногийн иргэдийн анхаарлын төвд байсан үйл явдлын нэг нь 16 настай охины амь насыг хохироосон гэх Ц.Дагвадорж, Э.Номин-эрдэнэ, Э.Ган-эрдэнэ нарын шүүх хурал байлаа. Тэгвэл тус хэргийн шүүх хурал энэ сарын 23-нд хуралдаж шийдвэрээ танилцууллаа. Тодруулбал, 16 настай охин болон 32 настай эмэгтэйн амь насыг онц ноцтойгоор хохироосон гэмт хэргийн шүүх хурал хоёр өдөр үргэлжилж, шүүгчид ялын тогтоолоо уншлаа. Шүүх бүрэлдэхүүн шүүгдэгч Ц.Дагвадоржид бүх насаар нь хорих ял оноож харин хэрэгт шүүгдэгч, хохирогч гэсэн хоёр статустайгаар оролцсон Э.Номин-эрдэнэ, Э.Ган-эрдэнэ нарт холбогдох хэргийг хэрэгсэхгүй болгож цагаатгалаа. Мөн насанд хүрээгүй шүүгдэгч Х.Энхсайханыг цагаатгаж шийдвэрлэв. Мөн гэмт хэргийн хор хохирол болгож, Ц.Дагвадоржийг 256 сая төгрөгийг 16 настай амь хохирогч Ч.Шинэсарангийн ээж Г.Отгонтуяад, 205 сая төгрөгийг 32 настай амь хохирогч З-н хууль ёсны төлөөлөгчид гаргаж өгөхөөр шийдвэрлэв

Хэргийг эргэн сануулбал, 2024 оны зургадугаар сард 20 настай Ц.Дагвадорж нь 32 настай эмэгтэй болон 16 настай охиныг хэдхэн хоногийн зайтай онц хэрцгийгээр хөнөөсөн байдаг. Өөрөөр хэлбэл, 2024 оны зургадугаар сарын 8-9 шилжих шөнө З гэх 32 настай эмэгтэйг гэрт нь хөнөөж, хүнсний скочоор ороон хувцасны шүүгээнд нь хийсэн байсан гэх. Талийгаач эмэгтэйг ар гэрийнхэн нь болон хууль хяналтынхан ололгүй олон хоносон учир цогцос нь өмхийрсөн байдалтай гэрээсээ олджээ. Харин дээрх хэрэг болсноос 12 хоногийн дараа буюу 2024 оны зургадугаар сарын 21-ний шөнө Ц.Дагвадорж нь архидан согтуурсан үедээ Хан-Уул дүүргийн II хороонд оршин суух 16 настай Ш гэх охиныг онц хэрцгийгээр хөнөөж, цогцсыг нь чемоданд хийсэн байсныг цагдаагийнхан илрүүлсэн байдаг.