Вьетнам улс То Ламыг эрх баригч Коммунист намын тэргүүнээр дараагийн таван жилд улируулан томилсон тухай төрийн хэвлэлүүд өнөөдөр (2026.01.23) мэдээллээ. Энэхүү шийдвэр нь таван жил тутам зохион байгуулагддаг намын их хурлын төгсгөлд гарчээ.

Нэг намын тогтолцоотой тус улсад шинээр бүрдсэн Төв хорооны 180 гишүүн То Ламыг улсын хамгийн эрх мэдэлтэй албан тушаалд “нэг саналтайгаар” дахин сонгосон байна.

То Лам 2024 оны дунд үеэс намын даргаар ажиллаж эхэлсэн бөгөөд энэ хугацаанд эдийн засгийн өсөлт хурдацтай байжээ. Түүний хэрэгжүүлсэн томоохон шинэчлэлүүд шийдвэр гаргах үйл явцыг түргэсгэж, хүнд суртлыг бууруулсан. Гэсэн хэдий ч олон арван мянган төрийн албан хаагч ажлаа алдахад хүрсэн нь шүүмжлэл дагуулсан байна. Өдгөө 68 настай То Лам мөн ерөнхийлөгчийн албан тушаалд нэр дэвшихээр зорьж байгаа бөгөөд холбогдох шийдвэрийг удахгүй зарлах төлөвтэй байна. Гэсэн хэдий ч хоёр дээд албан тушаалыг нэг дор хаших нь Хятадын удирдагч Ши Жиньпиний загвартай төстэй тогтолцоо бий болгож, хамтын удирдлага, дотоод хяналтад тулгуурласан Вьетнамын улс төрийн системд эрсдэл учруулж болзошгүй гэж шинжээчид анхааруулж байна.