АНУ-ын ерөнхийлөгч Дональд Трамп Иранд хандан анхааруулга өгч, “асар том флот” тус улс руу чиглэн хөдөлж байгааг мэдэгдлээ. Тэрбээр өчигдөр (2026.01.22) "Air Force One" онгоцонд сэтгүүлчдэд ярилцлага өгөхдөө “Болзошгүй нөхцөл байдалд бэлэн байхын тулд бид олон тооны хөлөг онгоцыг тэр зүгт илгээж байна” гэж хэлсэн байна. Гэхдээ тэрбээр “ямар нэгэн зүйл болохгүй байгаасай гэж хүсэж байна” хэмээн онцолжээ. Мөн уг флотыг ашиглах шаардлага гарахгүй байж магадгүй гэж хэлээд “Яахыг харцгаая” гэж нэмж хэлсэн байна.

Ирантай бизнес эрхэлдэг аливаа улсад 25 хувийн тариф ногдуулах төлөвлөгөөнийхөө талаар Трамп “Би үүнийг хэрэгжүүлнэ” гэж хэлсэн бөгөөд “Маш ойрын хугацаанд” гэж тодотгожээ. Трамп өмнө нь Ираны эрх баригчид эсэргүүцлийн жагсаалд оролцогчдыг хүчээр дарах гэсэн тохиолдолд АНУ цэргийн арга хэмжээ авах боломжтойг удаа дараа мэдэгдэж байсан юм.

Гэсэн хэдий ч тэрбээр нэгдүгээр сарын 16-нд Иранд талархал илэрхийлж, “Иран 800 гаруй хүний цаазаар авах ялыг цуцалсан” хэмээн мэдэгдсэн байна.