Нийслэлийн Иргэдийн төлөөлөгчдийн хурлын төлөөлөгч, "Улаанбаатар хотын хөгжлийн корпораци" ХХК-ийн захирлаар давхар ажилладаг Ж.Сандагсүрэн иргэдийн алхалтыг тоолж, “ногоон” оноо олгоно гэх “Хотула” аппликейшнийг 1.2 тэрбум төгрөгөөр шууд худалдан авах гэрээг өнгөрсөн онд /2025.11.02/ байгуулжээ.

Тус аппликейшний анхны зориулалт нь нийслэлийн гэр хорооллын айл өрхүүдийг хагас кокс болон хийн түлшээр хангахад хяналт тавих нэгдсэн системийн үүрэг гүйцэтгэх ёстой байжээ. Улмаар чиг үүргийг нь иргэдийн алхаа, явсан чиглэлийг хянах болтол өргөжүүлж буйгаа хотын удирдлагууд зарласан.

Энэ программыг төрийн худалдан авах ажиллагааны нэг үүсвэрээс худалдан авах аргыг ашиглан, "Дижитал инфосек" ХХК-ийн 34 хувийг "Улаанбаатар хотын хөгжлийн корпораци" авсан байна. Өөрөөр хэлбэл, “Ай си ти групп” компанийн зүгээс “Хотула” аппликейшнийг ямар нэгэн тендер, сонгон шалгаруулалтгүй нийслэлд нийлүүлж, хөгжүүлэлтийг нь дээрх охин компаниараа дамжуулан хариуцахаар давуу эрх эдэлжээ.

Нийслэлийн өмчит "Улаанбаатар хотын хөгжлийн корпораци" ХХК-аас тус аппликейшний урьдчилгаа төлбөр болох 800 сая төгрөгийг 2025.11.07-нд шилжүүлсэн. Үлдэгдэл 400 сая төгрөгийг 2026 оны төсөвт үндэслэн шилжүүлэхээр гэрээлсэн байна.

Энэ нь нийслэлийн ИТХ-ын төлөөлөгч Ж.Сандагсүрэн нийслэлийн хөрөнгөөр шууд худалдан авалт хийж байгаа анхны тохиолдол биш. Тэрбээр 2020-2023 онд хотын дарга Д.Сумъяабазарын нэгдүгээр орлогчоор ажиллаж байхдаа, нийтийн тээврийн парк шинэчлэлд хуучин “ногоон” автобусыг шинэ хэмээн улсын нууцад хамруулан, шууд худалдан авалт хийсэн хэрэгт холбогдон албан тушаалаа огцорч байсан юм.