Монгол Улсын иргэд Бүгд Найрамдах Колумб улс руу нэгдүгээр сарын 26-наас эхлэн визгүй зорчих боломжтой болжээ. Гадаад харилцааны яамны хэвлэлийн төлөөлөгч Р.Нямдаваа хэлэхдээ “Монгол Улсын энгийн гадаад паспорт эзэмшигч иргэд нийт 30 улсад визгүй зорчих боломжтой бол дипломат паспорт эзэмшигч иргэд 68 улсад визгүй зорчдог. Визгүй зорчих асуудал нь хоёр улсын харилцан хэлэлцээрээр шийдэгддэг. Хэлэлцээрийн үндсэн зарчмуудыг талууд тохиролцсоны дараа Засгийн газрын түвшинд хэлэлцэн, эцэст нь албажуулж баталгаажуулдаг. Үүний дараагаар визгүй зорчих нөхцөл хэрэгжиж эхэлдэг.

Хамгийн ойрын хугацаанд бодит үр дүнд хүрсэн хэлэлцээр бол Колумб улстай байгуулсан визгүй зорчих хэлэлцээр юм. Уг хэлэлцээрийн хүрээнд нэгдүгээр сарын 26-наас эхлэн Монгол Улсын иргэд Колумб улсад визгүй зорчих боломжтой болсон.

Сүүлийн жилүүдийн онцлох үр дүнгээс дурдвал аялал жуулчлалын гол чиглэлд тооцогддог Вьетнам, Узбекистан улсууд руу визгүй зорчих нөхцөл бүрдсэн нь чухал ач холбогдолтой юм. Харилцан тавигддаг шаардлагууд нь олон улсын харилцааны практикт тулгуурладаг. Үүнд тухайн хоёр улсын улс төрийн харилцааны түвшин, нийгэм, эдийн засгийн нөхцөл байдал, гэмт хэргийн гаралтын түвшин, мөн тухайн улсын иргэд визний зөрчил гаргадаг эсэх зэрэг хүчин зүйлс чухал нөлөөтэй байдаг. Монгол Улсын хэмжээнд визний нөхцөлөөс чөлөөлөх, харилцан визгүй зорчих хэлэлцээрүүд үргэлжилж байна” гэв.

Колумбын тухай товч мэдээлэл хүргэхэд тус улс нь Өмнөд Америкийн аялал жуулчлалын хамгийн эрчимтэй хөгжиж буй орнуудын нэг юм. Сүүлийн жилүүдэд дотоодын аюулгүй байдал сайжирч, олон улстай визгүй зорчих нөхцөл бүрдсэнээр гадаад жуулчдын тоо тогтмол өсөж байна. Карибын тэнгис, Номхон далайн эрэг, Андын нуруу, Амазоны ширэнгэн ойг нэг дор багтаасан өвөрмөц байгальтайгаараа алдартай. Цагаан элстэй наран шарлагын газрууд, халуун орны ширэнгэн ой, өндөр уулын хотууд жуулчдын сонирхлыг ихээхэн татдаг. Колумб нь түүх, соёлоороо баялаг. Картахена хотын колонийн үеийн хуучин хот, Боготагийн алтны музей, Муйска, Тайрона соёлын дурсгалууд нь дэлхийн жуулчдын заавал үзэх газруудын тоонд ордог. Мөн кофе үйлдвэрлэлээрээ дэлхийд алдартай бөгөөд “Кофены бүс нутаг” нь аялал жуулчлалын томоохон брэнд болжээ. Салса, кумбиа зэрэг латин хөгжмийн өлгий нутаг, өнгөлөг баяр наадам, найрсаг ард иргэдтэй гэдгээрээ онцлогтой аж.