Төв Азийн орнууд болон Хятадын хооронд 2025 онд гадаад худалдааны эргэлт 106.3 тэрбум ам.долларт хүрч, дээд амжилт үзүүлсэн тухай Хятадын Худалдааны яам мэдээлэв. Тодруулбал, экспорт, импортын нийт хэмжээ 2024 онтой харьцуулахад 12 хувиар өссөн нь тав дахь жилдээ дараалан тогтвортой өсөлт үзүүлж буйг харуулжээ.

Ийнхүү Хятад улс Төв Азийн орнуудын хамгийн том худалдааны түншийн байр суурийг анх удаа эзэлсэн байна.

Хятадаас бүс нутгийн орнууд руу гаргасан экспорт 11 хувиар өсөж, 71.2 тэрбум ам.долларт хүрсэн байна. Экспортын дийлэнх хэсгийг цахилгаан хэрэгсэл болон өндөр технологийн бүтээгдэхүүн эзэлсэн байна. Ялангуяа цахилгаан автомашин, литийн зай хураагуур, нарны хавтангаас бүрдэх “шинэ гурвал” хэмээх бараа бүтээгдэхүүний нийлүүлэлт мэдэгдэхүйц нэмэгдсэн байна. Төв Азийн орнуудаас Хятад руу хийсэн экспорт 14 хувиар нэмэгдэн, 35.1 тэрбум ам.долларт хүрчээ. Үүний зэрэгцээ түүхий эдийн бус бараа бүтээгдэхүүний нэр төрөл нэмэгдсэн бөгөөд химийн үйлдвэрлэл, металлурги, хөдөө аж ахуйн салбаруудад хамгийн их өсөлт ажиглагдсан байна.